شهادة أمام الله.. لاعب نادي جي يروي تفاصيل أزمة مباراة القناطر الخيرية
علق زياد ميسي لاعب الفريق الأول لكرة القدم في نادي جي على ما حدث في مباراة فريقه أمام القناطر الخيرية، والتي شهدت أحداثًا مؤسفة من كلا الفريقين.
لاعب نادي جي يروي تفاصيل أزمة مباراة القناطر الخيرية
وكتب زياد ميسي عبر حسابه الرسمي على فيس بوك: أنا زياد لاعب نادي جي وهحكي اللي حصل في المباراة بالحرف الواحد والله شاهد على ما أقول.
وأضاف زياد: أنا نزلت الشوط التاني وكانت النتيجة تأخر فريقي 2-0 نزلت وكنت موفق وأحرزت الهدف الأول وبعدها فوجئت إن جمهور الخصم بدأ يحاول يأثر عليا بالشتيمة وتصاعد الأمور وكمان بدأ أحد أفراد الجهاز الفني وبعض لاعيبة الفريق الخصم محاولة استفزازي بالكلام لمحاولة التأثير عليا نفسيا.
وأكمل زياد ميسي: بعدها بدأت الأمور تتصاعد كل ما المس الكورة (زي ما يكون الجمهور حطني في دماغة أنا بالذات) شتيمة وإشارات خارجة من الجمهور وصلت لحد تهديد "هنوريك لما تجيلنا القناطر" لحد ما أحرزت هدفي الثاني وهدف التعادل عشان أشير للجمهور بإشارة (السكات فقط) دون أي تجاوز أو شتيمة منى مثلا زي ما تشتمت واستمروا في التجاوز لحد لما أحرزنا الهدف الثالث بعدها.
وواصل زياد ميسي: وفي آخر دقائق المباراة وفي كورة مشتركة دخل أحد لاعبي الخصم دخول عنيف جدًا (حرفيا مكنتش حاسس برجلي من الألم) وفضلت واقع على الأرض مش قادر أقوم وفي الهجمة دي أحرز الخصم هدف التعادل بعدها لاقيت حد نازلي وبمنتهى الغل (مكنش في المباراة) قعد يجر فيا من رجلي اللي وجعاني ولاقيت واحد تاني بيضربني بالرجل في ضهري ونازلين فيا ضرب وأنا مش قادر أقاوم حتى من الألم بسبب الإصابة (اللي مقدرتش أكمل الماتش بسببها وفريقي لعب 10 لاعيبة) فـ مديري الفني كابتن إبراهيم صلاح لما شاف المنظر ده واللاعب بتاعة بيتهان وبيحصل فيه كده لاقيته بيجري على الشخص ده عشان يدافع عني وده المشهد للأسف اتقص واتحول من إن كابتن إبراهيم بيدافع عن حد شايفه بيموت قدامه من الألم وناس عمالة تضرب وتفتري عليه وهو مصاب ومش قادر حتى يدافع عن نفسه.
واختتم تصريحاته قائلا: المشهد اتقص بطريقة فجة اكنة رايح يضرب الناس.. ودي شهادة منى أمام الله وجمهور الكورة المصرية الأكيد ميرضهوش إن حد محترم زي كابتن إبراهيم اللي عمره في حياته ما عمل مشكلة طول مسيرته الكروية يتظلم ويتم الافتراء علية بالطريقة دي.
