محمد صبحي عن شائعات وفاته: عايزين يركبوا التريند.. ولو فنان توفاه الله أول من يعلن نقابة المهن
علق الفنان محمد صبحي على شائعات وفاته التي تداولت مؤخرًا في أثناء تواجده داخل أحد المستشفيات وقت تعرضه لوعكة صحية، معربًا عن حزنه لفقد البعض إنسانيتهم.
محمد صبحي
وقال محمد صبحي في لايف عبر فيسبوك: الناس اللي بتطلع شائعات وفاتي فقدوا إنسانيتهم وعايزين يركبوا التريند، بيكتبوا إنا لله وإنا إليه راجعون، ولما بدخل أشوف بلاقي إعلان صابون، لو فنان توفاه الله، أول من يعلن هو نقابة المهن، فـ نصبر شوية لحد ما تعلن.
وتابع: أنا سعيد بمرضي وشفائي وإني واقف قدامكم ومعاكم.. وعكة صحية وعدت وبستعد إني أعود تاني للمسرح لأنه حياتي ورسالتي وإياك أن تفقد إنسانيتك، وبجهز مسلسل رحلة المليار، دا اسم مؤقت من إخراج عمرو عابدين، أتمنى يكون من إنتاج التليفزيون المصري لأن القنوات مش هترضى تاخده أو مش هتكون حابة.
وتطرق محمد صبحي خلال حديثه عن حريق مسرح مدينة سنبل، معلقًا: قبل مرضي اتعرض مسرح مدينة سنبل للحرق كل حاجة فيه حتى الأجهزة، وحتى الشريط اللي سجلت عليه فارس يكشف المستور، وأيضًا بيتي ولع، قدر الله ما شاء الله فعل، ولكن يجب أن نحذر.
واختتم: بشكر دكتور أشرف زكي وترشيحي لجائزة الدولة التقديرية، عرفت وأنا في المستشفى، مفرحتش أوي لأن اترشحت 70 مرة لها قبل كده، وقالولي الجائزة ليك بس تنازل عشان الست دي، فخلاص فقدت قيمتها بس أنا هاخدها عشان الناس بتاعت التريند.
