هيام عباس باكية: إحنا كفلسطينيين صعب يكون عندنا لحظة سعيدة.. وبحب أذكر نفسي أني مقدرش أفرح لوحدي
أعربت الفنانة الفلسطينية هيام عباس، عن حزنها الشديد بسبب ما يعانيه شعبها في حربه مع الكيان الصهيوني، موضحة أنها بالرغم من فرحتها الكبيرة بـ تكريمها بمهرجان القاهرة السينمائي، إلا أن الفرحة لم تكتمل بسبب تفكيرها في شعبها ومعاناتهم.
وقالت هيام عباس، في لقائها مع القاهرة 24: لحظة التكريم بصراحة إحنا في الفترة دي كفلسطينيين صعب جدًا يكون عندنا لحظة سعادة وأفكر بس في نفسي، لأن أنا كمان حتى في السينما وشغلي شايلة اسم وهوية فلسطين وبفتخر وبعتز بيها، وصعب أني أكون بس سعيدة لأني أخدت تقدير بينما الشعب الفلسطيني تحت معاناة.
وتابعت هيام عباس: كيف ممكن اليوم كفلسطينية تاخدي جائزة من غير ما تفكري في الأطفال اللي اتحرمت من أحلامها؟، الأمهات اللي اتحرمت من أبنائها والناس اللي اتهرجت والناس اللي ماتت من الجوع، مش عايزة أظهر وكأني حاملة العذاب الفلسطيني على ظهري ولكن صعب لأنهم مش بعيد عننا، ولكنني بحب أذكر نفسي أني مقدرش أفرح لوحدي، لأن في ناس بشعبي وبوطني لسه بيتعذبوا ولسه مش قادرين يحصلوا على لحظة سعادة زي اللي أنا وصلت لها.
هيام عباس تتحدث عن تكريمها في مهرجان القاهرة السينمائي
وعلى جانب آخر، سبق وتحدثت هيام عباس، عن تكريمها بمهرجان القاهرة السينمائي، قائلة: التكريم اسمه حلو الهرم الذهبي، سعيدة أن عندي هذا التقدير من مهرجان القاهرة السينمائي، من أكبر المهرجانات المصرية والعربية والعالمية، السينما المصرية كانت هي أساس الحلم السينمائي لأنها أول سينما اتشهرت بالعالم العربي، وكان دايمًا في لينا لقاء معاها دائمًا وعرفتنا أن في حاجة اسمها سينما وتمثيل وإخراج، دي حاجة زرعت فيا أحلام أكبر، واليوم الدائرة رجعت اتقفلت للتقدير في القاهرة.
