أقوال زوج السائحة ضحية هجوم سمكة قرش بسهل حشيش: توفيت بعد ذهابها إلى المستشفى
قضت محكمة استئناف شمال القاهرة، بتعويض ورثة السائحة النمساوية ضحية حادث هجوم سمكة قرش سهل حشيش، بمبلغ مليون جنيه تعويضًا مدنيًا عمّا تعرضت له مورثتهم خلال الواقعة، التي هزّت الرأي العام في يوليو 2022.
زوج السائحة ضحية حادث هجوم سمكة قرش سهل حشيش في التحقيقات
وحصل القاهرة 24 على أقوال الزوج في واقعة هجوم سمكة قرش بسهل حشيش على زوجته أمام جهات التحقيق: أنا جيت مع مراتي من النمسا على الغردقة يوم 2022/9/2 على الشالية بتاعي في قرية صن جيت، ونزلنا على الشاطئ حوالي الساعة 5 مساءً وحطينا الشنط وروحنا نعمل سنوركلينج، بعد حوالي 10 دقائق، قلت لها أنا هطلع أريح شوية علشان هي عارفة إني بتعب بسرعة، وطلعت أريح وهي كانت جمبي في المية وما راحتش بعيد، هي نزلت تاني حوالي 10 دقائق وبعدها أنا طلعت، قالتلي أنا 5 دقائق واطلع وراك، وقلت لها ماشي.
وأضاف الزوج: لما طلعت مرة واحدة لقيت واحد ماسك صفارة وبيصفر بطريقة هستيرية وبيقول الكل يطلع في خطورة، ولقيت مراتي مش بتستجيب معاه، فرحت ناحيتها وأنا واقف على المارينا من فوق وفضلت أقول لها اطلعي بسرعة، بعد شوية لقيت حواليها دم في المية، ومفهمتش ده من إيه، وسمعت حد يزعق بصوت عالي بيقول فيه سمكة قرش، بعديها المنقذ نزل وكان معاه معدة يستخدمها في الإنقاذ زي مركب صغير وطلعها بيها، وأنا ساعدته علشان نطلعها لفوق على المارينا بمساعدة باقي الناس الموجودين معانا.
وأردف الزوج في واقعة تعرض زوجته لـ هجوم سمكة قرش: لما طلعت لقيت أيديها اليمين ورجليها اليمين مقطوعين، وصباع إبهامها الشمال مقطوع منه عقلة، وبعدين حاولنا نعمل لها تنفس صناعي وإسعافات، وكانت مش بتتحرك، وكان في واحدة معانا بتقول إنها دكتورة وكانت بتقول إنه في نبض، بعدها جات عربية الإسعاف ونقلتها على المستشفى، وطول الطريق كانوا بيعملوا لها إسعافات أولية، ولما وصلنا المستشفى حاولوا يعملولها الإسعافات اللازمة، بس الدكتور بلغني إنها توفت.
