كابونجا لـ القاهرة 24: أنا مش بلطجي وبغني لـ الهاي كلاس.. وحذفت كل فيديوهاتي المسيئة
اعتذر مطرب المهرجانات الشعبية إسلام كابونجا، عن الفيديوهات المسيئة التي انتشرت على السوشيال ميديا، وجعلت نقيب الموسيقيين يصدر قرارًا بإحالته إلى التحقيق.
وقال كابونجا في بث مباشر مع القاهرة 24: أنا مُتعلم وبدرس في كلية تجارة، مش بلطجي ولا جاهل زي ما بيتقال عني، واسم كابونجا ده لاعب كورة يعني مش بلطجي، والحركات اللي بعملها وأنا بغني بتكون لا إرادية وفي الكواليس عشان أقدم أحسن أداء، وأنا بقدم أغاني لـ الهاي كلاس وكل الفئات.
وأضاف كابونجا: اللي حصل ده غلطة غير مقصودة واتحاسبت عليها وكنت متحاسب عليها قبل كده، واتعلمت بسببها درس ومينفعش أقول كلمة غلط حتى لو بهزار، ربنا كبير وإن شاء الله يقف معايا في الأزمة دي، ومن خلال القاهرة 24 بعتذر لكل الناس اللي سمعت الكلام ده ومش هيتكرر تاني.
كما كشف إسلام كابونجا كواليس التحقيق معه في نقابة المهن الموسيقية، قائلًا: اللي حصل في التحقيق جابولي أغاني كتير قديمة ليا، وحذفتها ونفذت في ساعتها بعد ما النقابة طلبت، مصطفى كامل حذرني قبل كده كتير وبقوله آسف ومش هتتكرر وأنا لو متحكم في قناة واحدة هتحكم أمسح لكن معايا صناع بينشروا عندهم ومينفعش أمسح في ساعتها، أي حاجة هتطلع من النقابة هحترمها وأستاذ مصطفى كامل اللي يقوله سيف على رقبتي وبنصح أي حد بيقول أي كلمة يمسحها عشان هيتهاجم، الناس اللي بتنجح لازم يطلعولها الحاجات القديمة.
وأكد إسلام كابونجا، أنه سيتغير كليًا خلال الفترة المقبلة، وسيقدم أغاني تليق بالذوق العام، كما علق على إمكانية تقديمه أغاني رومانسية قائلًا: مش هينفع أقدم رومانسي يعني ينفع عمرو دياب أو تامر حسني يغنوا الأغاني بتاعتي.. أكيد لا.
التحقيق مع إسلام كابونجا
ومثل مطرب المهرجانات إسلام كابونجا، اليوم، أمام جهات التحقيق ولجنة العمل بنقابة المهن الموسيقية، للتحقيق معه على خلفية أزمة الفيديوهات المسيئة.
وسبق وأعلن مصطفى كامل نقيب المهن الموسيقية، إيقاف التصريح الربع سنوي الخاص بمطرب المهرجانات إسلام كابونجا، قائلًا عبر فيس بوك: قولًا واحدًا لا مكان لهذا الشخص بيننا وإيقاف التصريح الربع سنوي له.. وغدًا بإذن الله استطلاع رأي الزملاء بلجنة العمل بشطبه نهائيًا، تم تحذيره كثيرًا.. وتم التنبيه عليه كثيرًا ولا حياة لمن تنادي، مع العلم أن مسئولية ترخيص ورقابة وإجازة كلمات الأغاني تعود إلى وزارة الثقافة والإدارة العامة للرقابة على المصنفات الفنية.
