قعدت يومين علشان أتخطاه.. مراد مكرم يكشف كواليس قتل زينة في مسلسل ورد وشوكولاتة
أعرب الفنان مراد مكرم عن سعادته بردود أفعال الجمهور حول دوره في مسلسل ورد وشوكولاتة بطولة الفنان محمد فراج وزينة، ويعرض العمل حاليًا عبر إحدى المنصات الإلكترونية، وتصدر تريند السوشيال ميديا فور طرحه.
مراد مكرم: قعدت يومين علشان أتخطى مشهد قتل زينة
وقال مراد مكرم في تصريحاته لـ القاهرة 24: مشهد قتل زينة وتشويه جثتها، ساب أثر عليا وقعدت يومين تلاتة علشان أتخطى، مهما كنت محترف في الآخر أنا بني آدم، وأنا متعود بعمل اللي عليا وبفصل أول ما يتقال cut، بس ده مش معناه إن ميبقاش فيه أثر بسيط يفضل لحد ما تخرج من الشخصية نهائي، والمشهد ده كان من أصعب المشاهد اللي صورتها في المسلسل.
وتابع: ردود أفعال الجمهور على المشهد كانت فوق توقعاتي بكتير، أنا كنت عارف إن المشهد تقيل ومش سهل على أي حد يشوفه، لكن إن الناس تتأثر بالشكل ده معناه إن الشخصيه وصلت، وإن الرسالة اتفهمت صح.
وأضاف: أكبر تحدي كان إن الشخصية ليها طبقة إنسانية مظلمه جدا فلازم تتعمل بحرص، قعدت وقت قبل التصوير أفهم الدوافع وليه بيعمل كده؟ بيفكر إزاي؟
وتابع: كمان التحضير الجسدي والصوتي كان مهم، طريقة الكلام، سرعة النفس، النظرات، كل تفصيلة بتقربك أو بتبعدك عن صدق الشخصية، وفوق ده كله، إنك تشتغل وسط فريق تقيل زي مخرج العمل ماندو العدل وفراج وزينة وشركة الإنتاج وباقي فريق العمل بأكمله.
