محمد بركات: جماهير الأهلي أعادتني للحياة.. واعتزلت بسبب الملل
كشف محمد بركات نجم الأهلي ومنتخب مصر السابق، العديد من الكواليس في مسيرته الكروية الطويلة سواء رفقة الإسماعيلي أو الأهلي، وحقيقة انتمائه لنادي الزمالك.
أبرز تصريحات محمد بركات نجم الأهلي السابق
وقال بركات في تصريحات مع الإعلامي معتز الدمرداش، عن بداية مشواره مع الأهلي: جماهير الأهلي حاجة كبيرة، وهما اللي رجعوني للحياة لأن وقت انتقالي من قطر إلى الأهلي الموج كان عالي عليا والانتقادات كانت كتيرة، والكلام وقتها إني مخلص كورة وعيان والأهلي اشترى التورماي وشرب مقلب بسبب إني عندي الغدة ومش هقدر أعمل حاجة.
وأضاف: الموضوع كان صعب ووضع عليا ضغوط، لكن اللي خرجني كان مانويل جوزيه لما قعد معايا في الأوضة قبل أول تمرين ليا مع الفريق، وقالي إنت عارف أنا جبتك ليه؟ علشان أنت من أفضل اللاعبين في مصر وهتعمل إضافة للنادي الأهلي، وده كان قبل ما أنزل التمرين وفي أول ماتش جمهور الأهلي كان بيهز المدرج وهو بيغنيلي وقالي: بركات بركات والله بعودة يا بركات، فلما المدرب يتعامل معايا كده والجهور يستقبلني بالشكل دا، يبقى مفيش قدامي حل غير إني أقدم كل اللي عندي.
وعن الأهداف الأفضل في مسيرته، كشف: هدف التعادل في مرمى الزمالك بمباراة 3-3، لأنها مباراة قمة وكل فريق مش عايز يخسر والمباراة كانت 3-2 لصالح الزمالك، والناس دايما بتفكرني بيها وإن بركات مخسرش مباراة وهو بيلعب ضد الزمالك.
وشدد نجم الأهلي السابق: الضغوطات مش بتفرق معايا، أنا ماشي في شغلي واللي عايز يتكلم براحته، خاصة إن منذ انتقالي من السكة الحديد إلى الأسماعيلي عانيت من عدم الترحيب من الجماهير، كما وجدت صعوبات في المشاركة في البداية بسبب وجود أحمد حسن في نفس مركزي، وكنت بشارك في أوقات قليلة حتى تعرض حسن للإيقاف وحصلت على الفرصة.
وأوضح: بعد انتقالي إلى الإسماعيلي من السكة الحديد، سمعت أحد جماهير الدراويش يقول: هي المشرحة ناقصة قتلة، بسبب إصابتي بكسر في القدم خلال تلك الفترة.
بركات يرد على حقيقة انتمائه لنادي الزمالك
قال محمد بركات عن تشجيعه لنادي الزمالك: هذا الكلام انتشر من فترة وكنت بتضايق لكن حاليا مش بشغل بالي، لكن الفكرة إن كل عيلة فيها الأهلاوي والزملكاوي، وإحنا كنا الفرع الوحيد الأهلاوي وعمي الزملكاوي هو اللي اكتشفت موهبتي ولفت نظر والدي ليها.
وواصل: عمي قال لازم ألعب في نادي وكانت تربطه علاقة قوية بحمادة إمام نجم الزمالك، وبالفعل كلمه علشان ألعب في النادي وإمام رحب وأخدنا كارت توصية، ولما روحت من مدينة نصر إلى ميت عقبة، والدي قالي: المشوار هيكون بعيد عن البيت وهنشوف نادي أقرب فكان الاختيار على السكة الحديد، ودخلت مدرسة الكرة بعدها فريق الناشئين وتم تصعيدي للفريق الأول بعدها.
وأكمل: الأهلي هو النقلة الحقيقة في مشواري والمحطة الأهم، ولما دخلت في المنظومة وشوفت الناس والتعامل والجمهور والألقاب الجماعية والفردية، فعلا الأهلي مختلف تماما، ولاقيت في النادي كل حاجة بيحتاجها لاعب الكرة من التزام، انضباط، العدل، الجمهور والماديات مش بتتأخر.
وأفاد: في الإسماعيلية الناس بتهتم بالكرة الحلوة بزيادة، لكن جمهور الأهلي عايز الكرة الحلوة والمتعة والبطولات، لأنه نادي بطولات وأي حد لعب في الأهلي هتلاقيه كسب بطولات.
بركات يتحدث عن اعتزال الكرة
وأوضح نجم الأهلي السابق: اعتزلت علشان لعبت بدري فوصلت لمرحلة من الزهق، ولحد آخر مباراة كنت جايب جولين ومسجل أهداف في معظم المباريات لكن المجهود قل والسرعة قلت ولما حسيت بالزهق قولت بلاش أوصل لمرحلة إني مش قادر، خاصة إن جمهور الأهلي عايز كل لاعب يدي كل حاجة عنده، مكنتش عايز ألعب لحد ما الناس تقولي كفاية فأخدت القرار.
وعن وضع الكرة المصرية، قال: حال الكرة المصرية ممكن يكون مش أحسن حاجة، لسبب بسيط أنا لما بتكلم عن حال الكرة بتكلم عن المنتخب اللي عايز أشوفه قوي وبينافس على البطولات، لأننا مأخدناش بطولة من وقت كبير جدا، وحتى الآن تجربة حسام حسن ناجحة بنسبة 100% لأننا بنتكلم عن النتائج وهو وصل بالمنتخب لكأس العالم.
وشدد: أدعو الناس اللي بتكسر في حسام حسن هو مش ذنبه إن المنافسين في تصفيات كأس العالم لم يكونوا أقوياء، لكنه من حقه ياخد وقته خاصة إن النتائج إيجابية حتى الآن، وأمم إفريقيا هتكون اختبار مهم وحقيقي لكن مينفعش نستنى ليه الوحش.
واختتم بركات تصريحاته: محمد صلاح أعظم لاعب في تاريخ الكرة المصرية، إحنا اتربينا على الخطيب وحسن شحاتة وعارفين إنهم الأعظم.. لكن اللي وصل إليه صلاح طوال السنوات الماضية منذ بداية مشواره حتى الآن يجعله الأعظم في تاريخ مصر.
