أحمد السقا يدعم شيرين عبد الوهاب: أنتي قيمة ورمز من رموز البلد
حرص الفنان أحمد السقا على دعم الفنانة شيرين عبد الوهاب، وذلك بعد الأزمات التي تمر بها خلال الفترة الحالية، وشائعات اعتزالها الفن التي انتشرت خلال الأيام الماضية أيضًا.
أحمد السقا يدعم شيرين عبد الوهاب
وتحدث أحمد السقا خلال لقائه مع القاهرة 24، قائلا: شيرين عبد الوهاب قيمة ورمز من رموز البلد ومحدش معصوم من الخطأ وشيرين عبد الوهاب هتفضل شيرين عبد الوهاب.
ومن جانبه سبق أن علقت الفنانة شيرين عبد الوهاب، على شائعات اعتزالها الفن وقالت شيرين عبد الوهاب، في تسجيل صوتي: بحضر مفاجآت مختلفة وجديدة هتفرحوا بيها أوي، هغني ليكم بس من أماكن مختلفة، وهفضل أغني لحد ما أموت ومفيش اعتزال، الاعتزال هو الموت، وطول ما أنا عايشة بغني وبحبكم وواصلني حبكم، أنا عايشة بيه وعايشه ليه.
وواصلت شيرين عبد الوهاب: مش بستسلم أبدًا، في حاجات جامدة جدًا بتحصلي من أقرب الناس ليا تكسير وقتل بس أنا جامدة وربنا معايا ومقويني، وأنا بتاعتكم أنتوا وعايشة علشانكم أنتوا، واستنوا الحاجات الجديدة اللي نازلة وأنتوا الدنيا بالنسبة ليا.
وكان تصدر خلال الفترة الماضية هاشتاج شيرين فين على موقع إكس، وذلك بعد حديث صديقها الفنان رامي صبري عنها في برنامج الحكاية مع الإعلامي عمرو أديب، قائلًا: شيرين صحبتي وأختي ودائما بسأل عليها وهي من أكتر صوت مصري موجود على كل الأبلكيشن الموسيقية مع أنها بقالها أكتر من 7 سنين منزلتش أغاني جديدة بعيدًا عن الألبوم اللي نزل من سنتين.
