دمر لي حياتي.. سيدة تزعم تعرضها للنصب بسبب توظيف الأموال | تفاصيل
زعمت سيدة تدعى أمل عقيل تعرضها للنصب من قبل شخص وقعت ضحيته بما يسمى بـ توظيف الأموال في العقارات منذ عامين.
وقالت عقيل عبر منشور على فيس بوك: الشخص ده يدعي أ. م دمرني ودمر حياتي طول الفترة اللي قعدتها في مصر وخلاني عايشة في تهديد ورعب، وخد اللي ورايا واللي قدامي، تحويشة عمري اللي اتغربت سنين بسببها وخلاني أسيب بلدي وأدور على منحة برا عشان أبدأ حياة جديدة بعد اللي حصل فيّا.
سيدة تزعم تعرضها للنصب بسبب توظيف الأموال
وأضافت: أنا كنت عايشة سنين برا مصر بشتغل مضيفة ولما رجعت مصر وقت الكورونا كنت تايهة ومش عارفة أعمل أيه؟َ! للأسف وقعت في شراك توظيف الأموال، الشخص ده عرفني عليه حد قالي إننا هنشاركه في شغله بالعقارات، خد كل اللي معايا واداني شيكات، وشركته بعتتلي شقة المفروض استلامها بعد كام سنة، واللي كان مطمني إن المفروض إن دي شيكات وعقود قانونية، تضمن حقي بالقانون، لكن للأسف الدنيا طلعت مش سهلة زي ما كنت متصورة.
وأكملت أمل: أنا رفعت قضايا بشيكاتي.. اداني منها جزء بسيط بعد كده قالي اضربي دماغك في الحيط.. بقالي أكتر من سنتين عايشة في رعب والله.
وادعت: كل شوية يبعتلي مع ناس “إنها تخبط دماغها في الحيط ومش هتاخد حاجة” ومع الوقت ولما قبضنا عليه مرة واحدة بعد سنة تقريبا طلع تاني يوم، بعتلي تهديد إن فلوسي خسرت وإني لازم اتنازل واخد أي مبلغ منه يا إما هيإذيني.. وكل شوية تهديدات لحد ما بقى يجيلي نوبات هلع، ولو سمعت قطة ماشية في الشارع بموت من الرعب وأنا بنت وعايشة لوحدي، كان نفسي اكتب البوست ده وقتها، خفت جدًا خفت اتحاسب قانونيا لو في حاجة مش فهماها.. وخفت منه.
واستطردت: فلوسي بقت قيمها تراب والله.. شقى عمري طول الـ 6 سنين اللي اشتغلتهم واتغربت واتبهدلت عشانهم راحوا عليا، وحتى لو رجعوا فمبقاش ليهم قيمة خلاص، وفي الآخر قررت اسيب البلد وأرجع اتغرب تاني واسافر أدور على فرصة جديدة أبدا فيها من الصفر، رجعت بالزمن 10 سنين تاني حسبي الله ونعم الوكيل، بجد كان نفسي ألاقي الآمان في بلدي، أه أنا عارفة اني غلطانة بس المفروض إن الشيكات دي والعقود كانت تحميني قانونًا وترجعلي فلوسي أو حتى يتعاقب، لكن تقريًبا أنا يمكن اللي كنت جاهلة بالقانون أو عبيطة شوية، أنا مابقتش عايزة فلوسي خلاص، أنا بس كل اللي نفسي فيه إن الشخص ده يلاقوه ويتنفذ فيه القانون ويكون عبرة لأي شخص يحاول يأكل شقى حد.
واختتمت حديثها: دي أرقام القضايا؛ القضية رقم 14009 لسنة 2023 جنح أول أكتوبر صادر محكمة شبين الكلية 5025، القضية رقم 14008 لسنة 2023 جنح أول أكتوبر صادر محكمة شبين 5026.
