المؤلف محمد صادق: إيرادات فيلم هيبتا 2 تفوقت على الجزء الأول.. وجرأة الألفاظ وجهة نظر
علق المؤلف محمد صادق، على انتقادات جرأة الألفاظ في فيلم هيبتا 2 (المناظرة الأخيرة)، موضحًا أن الجرأة ما هي إلا وجهة نظر من شخص لآخر، معربًا عن سعادته بالنجاح الذي حققه العمل منذ طرحه في دور العرض السينمائية.
وقال محمد صادق، في لقائه مع القاهرة 24: كل واحد من حقه يقول رأيه والواحد بيحاول يبقى حقيقي على قد ما يقدر، في ناس ممكن متبقاش دي حياتها فهي شايفة إن مش طبيعي يسمعوا حاجة زي كده، وفي ناس تانية شايفة إنهم بيسمعوا ده كل يوم، فموضوع الجرأة ده وجهة نظر وكل واحد حر يقول اللي هو عايزه وينتقد والكاتب من حقه يكتب اللي هو شايفه ومحدش فيهم ييجي على حد، مفيش مشكلة نختلف ولكن الفكرة في أسلوب الاختلاف ونطور من نفسنا ونعمل اللي يرضي الناس.
وتابع محمد صادق: الفرق بين هيبتا 1 وهيبتا المناظرة الأخيرة، إن الزمن مختلف تمامًا وإحساسي الشخصي إن الفيلم عمل حاجة كويسة وإيراداته تفوقت على إيرادات الجزء الأول، والناس ممكن يكونوا اتضايقوا إنهم عايزين يشوفوا نفس الوجبة بتاعة الجزء الأول، ولكن في الجزء الثاني ناقشنا أن الحب بيختلف في وجهة نظر الرجل عن وجهة نظر الست، فالست بالمعاناة بتاعتها مختلفة عن الرومانسية في الجزء الأول يمكن ده اللي عمل الاختلاف.
أبطال فيلم هيبتا 2
شارك في بطولة فيلم هيبتا 2، نخبة من أبرز الفنانين منهم: كريم فهمي، منة شلبي، سلمى أبو ضيف، كريم قاسم، جيهان الشماشرجي، مايان السيد، والعمل من تأليف محمد صادق، وإخراج هادي الباجوري.
