أمينة خليل عن زوجها أحمد زعتر: أهلي مزنوش عليا علشان أتجوز.. وجوزي راكز وتقيل
تحدثت الفنانة أمينة خليل، عن زوجها المصور أحمد زعتر، معربة عن امتنانها الكبير لـ دعم عائلتها لها على مدار السنوات الماضية، موضحة أنه لم يكن هناك أي نوع من الإلحاح بخصوص زواجها، بجانب حديثها عن حبها الكبير للفن منذ الصغر.
وقالت أمينة خليل، في تصريحات إعلامية: أهلي مكنوش بيزنوا عليا علشان أتجوز، وفعلًا أنا محظوظة أن أهلي مختلفين وده اللي ساعدني أبقى البني آدمة اللي عليها دلوقتي، مفهوم الحب اتغير عندي وبقى أعمق، وكنت فاكرة أني عايزة حد شبهي وشبه تفكيري، وبعدين اكتشفت أن شريك حياتك ممكن يبقى عكسك، أنا شخصية عفوية ولكن مش همجية، وقابلت الشخص اللي حاسة أنه شبهي والعلاقة ممشيتش خالص، فقلت أني عايزة حد أساسياته شبهي بس شخصيته مختلفة، وأحمد جوزي راكز وقليل الكلام وتقيل، وأنا وصلت لمعادلة لما أدخل في قصة حب مديش قلبي كله.
وتابعت أمينة خليل: أنا بحب الحب، ومش لازم يكون حب لـ راجل ممكن يكون لعيالك وأهلك وشغلك، وعمري ما حسيت بـ جنون العظمة، وأنا ضد مبدأ أن الفنان يتحط في قالب معين ويتعامل بطريقة معينة، وبتعمد أني أقول رأيي، والناس بتستسهل أنها تحكم على بعض وده شيء بيعصبني جدًا، ليه بنحكم على بعض؟.
أمينة خليل: مدخلتش الشغلانة علشان الشهرة.. أنا عاشقة للفن
أما عن حبها للفن، فعلقت أمينة خليل: أنا مدخلتش الشغلانة دي علشان عايزة شهرة، أنا حقيقي دخلتها عشان بحبها، أنا بني آدمة حالمة وطموحة جدًا وعاشقة الفن من وأنا صغيرة، وأنا محظوظة من وأنا صغيرة لأن عائلتي دعموني من وأنا صغيرة.
كما روت أمينة خليل، موقفًا شعرت أنها تعرضت للظلم، قائلة: من 3 سنين جالي ديسك في ضهري وكنت بعمل أشعة وكنت ماشية متألمة جدًا، واحدة قابلتني وحاولت أني ابتسم مع أني والدي ووالدتي مسندني، وبعد أسبوع لاقيت صورتي نازلة ومكتوب أني تنكة وبتشتم، أنا عيطت وحسيت أني صعب عليا نفسي واتظلمت، وبعدها الناس دافعت عني ونزلوا صورهم معايا اليوم ده.
وأوضحت أمينة خليل، أنها لا تشعر أنها تحمل رسالة، قائلة: مش حاسة أن حاليًا أقدر أقول أن عندي رسالة، أنا مين علشان أقول رسالة، ويمكن لو عندي حاجة أقولها هقول أن الناس تسمع صوتها هي.
