منى زكي عن جدل فيلم الست: دا طبيعي لمكانة أم كلثوم.. كنا خايفين من رد الفعل وبسمع لكل اللي بيتقال
علقت الفنانة منى زكي، على الجدل المثار خلال الفترة الماضية بعد طرح برومو فيلم الست، الذي تقدم خلاله السيرة الذاتية لـ كوكب الشرق أم كلثوم، موضحة أن العمل تطرق لإظهار الجوانب الخفية في شخصية كوكب الشرق وليس الشكل الظاهري.
وقالت منى زكي، في تصريحات تليفزيونية: فيلم الست أصعب عمل في مشواري الفني لأننا بنتكلم على سيدة عظيمة نفسنا نديها حقها وأكتر لأنها تستاهل، فكان صعب بداية من الاسم للشخصية اللي أنا بقدمها وتحضيراتها لأني بقدم شخصية من نشأتها لغاية ما بتكبر في عقود، السيدة أم كلثوم مرت على 3 أو 4 عقود مختلفة وهي نجمة كبيرة، فكان صعب أوي المشاعر المختلفة لكل مرحلة والأداء والصوت وطريقة الكلام، كل حاجة كان فيها تحدي صعب جدًا.
وتابعت منى زكي: كنا قلقانين من رد الفعل ولكن الحقيقي أكتر أن البني آدم مش تمثال وعنده مشاعر ونقط ضعف وأوقات بيبقى غضبان وبيعمل قرارات مش صح، آه كنا خايفين ولكن كنا مؤمنين أن الحاجة الحقيقية مش بتسيء مظبوط أننا نحطها، علشان نعمل أقرب ما يكون من وجهة نظرنا داخل السيدة أم كلثوم مش الظاهر من برا للناس.
وعن الجدل، فعلقت منى زكي: طبيعي لمكانة السيدة أم كلثوم، أعتقد ده طبيعي وكان بيحصل جدل بالشكل ده كل ما يتعمل سيرة ذاتية لفنان، والجدل ده أنا بحترمه جدًا وبسمع لكل حاجة فيه.
