منتج فيلم السلم والثعبان 2: هنكمل في السلسلة.. وممكن نشوف قصص حب مختلفة
كشف المنتج موسى عيسى، منتج فيلم السلم والثعبان 2، عن أن فريق العمل سيُكمل سلسلة السلم والثعبان على مدار السنوات المقبلة.
وقال موسى عيسى، في تصريحات تليفزيونية: إحنا مكملين في السلم والثعبان، وممكن نشوف قصة حب في الطبقة الشعبية، أو قصة حياة ولد وبنت صغيرين، أو راجل وست كبار جدًا، فإحنا بس نخلص ولاد رزق 4، وبعدين نكمل السلم والثعبان.
منتج فيلم السلم والثعبان يرد على الانتقادات
كما علق موسى عيسى، على الانتقادات الموجهة لفيلم السلم والثعبان 2، قائلًا: فيه ناس مكنتش دخلت الفيلم وبتتكلم على السلبيات بناء على البرومو وآراء ناس تانية، وفيه ناس لما دخلت الفيلم طلعت اتكلمت كويس أوي عن الفيلم وقالوا قصة حب حلوة أوي واتبسطوا.
وواصل: التعليقات السلبية بتقول إن الفيلم فيه إيحاءات ومش مناسب للأطفال، وهو مش مناسب للأطفال بصراحة، واتكلموا على جرأة الفيلم، ومن الإيجابيات الناس حبت قصة الحب وأن ده فيلم مصري ومتصور كله في مصر.
وأضاف: من وجهة نظري أن الفيلم فيه شوية إيحاءات ولكن مش فجة أوي، وعلى حسب كل واحد عايز يفهمها إزاي، ولو الفيلم مش مبادئك أنت حر ومتدخلش، وأفلام زمان كان فيها أكتر من كده بكتير وكان فيه ممثل بيطلع بـ بدلة رقص.
