مونيكا مجدى ردًا على فشلها في حصد الأصوات في دائرتها: في ناس خذلتني
قالت مونيكا مجدى، المرشحة الخاسرة في انتخابات مجلس النواب عن دائرة شبرا وروض الفرج إن رصدها للمخالفات في الانتخابات جاء حبًا لبلدها ولرغبتها أن يخرج المشهد الانتخابى بشكل جيد.
وردا على سؤال حول مبالغتها في رصد المخالفات الانتخابية بالرغم من وجود مرشحين آخرين رصدوا نفس المخالفات وليس بنفس قدر مبالغتها قالت مونيكا مجدى في لقاء ببرنامج السياسة أسرار مع الإعلامية هند مختار على شاشة قناة هي: مؤسسات الدولة ليس لها علاقة بما يحدث خارج المدارس بشكل فردي، ولكن تصرفى جاء بسبب غيرتي على بلدي وأنا حاسة إني عندى رسالة عايزة أقدمها للمجتمع ولأهل دائرتي.
مونيكا مجدى ردا على فشلها في حصد الأصوات في دائرتها: في ناس خذلتنى
وتابعت: لو حصل إعادة في الدائرة الانتخابية من الممكن أن أنسحب من الانتخابات، متابعة ردا على فشلها في تحويل التريند والدعم الذى تلقته لأصوات على أرض الواقع في صناديق الاقتراع: أنا مافشلتش أنا وصلت للناس ولكن ضعف المشاركة هو اللى ظلمنى على أرض الواقع..وأنا معملتش "شو" لأن أنا بنت ومش هعرض حياتى للخطر في السياسة ولو هدفي ده كنت هعمله في مجال تاني.. ممكن الشو يتعمل لو حد بيشتغل محامي فا عايز الناس تعرفه لكن انا مش هعمله في السياسة.
وقالت مونيكا مجدى: أنا مش ظاهرة في المجتمع وأنا بحلم إنى أعمل حاجة حقيقية لبلدي واللي خذلني باقول ظروفه خلته يعتبر الانتخابات "شغلانة" كسبوا منها وكان في ناس معايا وسابتنى وراحت لمرشحين آخرين بسبب الفلوس.
وقالت مونيكا مجدى: أنا تربية الصعيد وقلبي جريء وأنا من محافظة قنا ومش بخاف من حد وجد والدتى شيخ بلد ونزولي الشارع لأنى مابخافش ومش بتعامل إنى بنت.
واستطردت: الناس علشان تؤمن بحد لسه إمكانياته مش كبيرة ده بياخد وقت وأكيد في أخطاء في حملتى الانتخابية وحاجات تحتاج دراسة أكتر.
