رامي إمام: عادل إمام أبسط واحد في اللوكيشن وبييجي بدري
كشف المخرج رامي إمام، خلال حواره مع الإعلامي عبد العزيز أحمد، عن كواليس عدد من أعماله الفنية وتجربته مع كبار النجوم، متحدثًا بنص تصريحاته دون إضافات.
وقال رامي إمام، في تصريحات تليفزيونية ببرنامج الإعلامي عبد العزيز أحمد المذاع عبر قناة الظفرة: أنا عملت أعمال كتير منها أمير الظلام، وجميع المسلسلات اللي فيها أكشن ودراما، لكن دايمًا لما الناس توقفني في الشارع تسألني عن غبي منه فيه، وفين الجزء التاني.
أعمال رامي إمام
وتابع: كمان فيلم 1/8 دستة أشرار، الفيلم ده من أحلى الأفلام اللي قريبة لقلبي، التجميعة دي مكنتش متواجدة سنة 2006، وكان فيه روح حلوة، والأجواء واللوكيشنز كانت حلوة، وياسمين عبد العزيز إنها تقول نجيب نيكول سابا تبقى موجودة علشان تضيف كفنانة في ناحية الجمال البلدي اللي بتلعبه.
وعن تعاونه مع والده الفنان عادل إمام، قال: الشغل مع عادل إمام مش مختلف عن الشغل مع الناس الكبار، لأن في الأول وفي الآخر كل فنان ليه توجه وفكر معين، هو أبسط واحد موجود في اللوكيشن، وبيتقبل توجهات المخرج، وبييجي بدري، وتجربتي معاه الناس كلها تشهد عليها.
وأضاف: العراف من أحلى الأعمال، والناس في الشارع بتكلمني عن صاحب السعادة قد إيه مأثر فيهم.
تصريحات رامي إمام
وعن أفلامه المفضلة لوالده، أوضح: بحب أشوف له فيلم المشبوه، ده من أكتر الأفلام اللي بحبها، لأني عارف كواليسه وإزاي كان تحدي إن والدي يعمله، وصعب النهاردة تجمع بين سعاد حسني وعادل إمام، الأداء التمثيلي ده حاجة تتدرس، وأتمنى أعمل له ريميك.
كما تحدث عن تعاونه مع هشام ماجد، قائلًا: هشام ماجد بنعمل مع بعض البحث عن الفضيحة، هو حبيبي ومحترم وبيحترم شغله وهادي.
واختتم رامي إمام تصريحاته قائلًا: والدي عادل إمام رحب بالتجربة، وهي مهمة أوي وليّا على المستوى الشخصي إننا نعرّف الجيل الجديد بأفلامنا والتراث الفني القديم.
وعن أعماله الجديدة، أشار إلى أنه يستعد لتقديم مسلسل عودة التلفزيون مع المؤلف يوسف معاطي، وهو موضوع مهم وجديد، ومن المقرر عرضه بعد رمضان، ويعد عودة له بعد غياب 5 سنوات.
