أحمد العوضي: مبحبش أطلّع البطل في مسلسلي بلطجي.. وتيمة المظلومية دايمًا حلوة
كشف الفنان أحمد العوضي، عن معاييره في اختيار موضوعات مسلسلاته الرمضانية، موضحًا أنه حريص على زيادة وعي جمهوره من خلال أعماله.
تصريحات أحمد العوضي مع الإعلامية إسعاد يونس
وقال أحمد العوضي، في لقائه مع الإعلامية إسعاد يونس، في برنامجها صاحبة السعادة: محبش أطلّع البطل في مسلسلي على إنه بطلجي، أطلعه قوي آه والقوة مالهاش علاقة بالبلطجة، وحتى لو استخدم القوى بيكون في الحق والصالح.
وتابع أحمد العوضي: همي كل سنة إني أعمل مسلسل يلمس قلوب الناس، وأنا من منطقة شعبية وعمري ما أنكرت ده، فكل اللي عايزه إن الناس لما تشوف مسلسل ليا تعرف إن أحمد قريب ومبعدش عنهم، فكل همي أقدم قصة تلمس الناس حتى وإن تشابهت أنه شعبي ولكن القصة مختلفة، البطل بيلمس الناس من غير ما أصدر حاجة مينفعش يقلدوني فيها، ودوري أني مخلش أخويا يقلدني في حاجة وحشة، ولو البطل أتعرض لحاجة وحشة أقول أن ده وحش علشان يتعلم منه.
وأضاف: بنقي الموضوع القريب للناس، اللي بحب أتفرج عليه بحب أقدمه للناس، وأنا بقترح الموضوع اللي عايزين نتكلم فيه ومحمود حمدان عنده الحس الشعبي زيي، وتيمة المظلومية حلوة والناس بتحبها، والبني آدم بطبعه عنده إحساس بيميل إلى المظلومية، ولما تقدم له المظلوم بيتفاعل معاه وبحب النوعية دي من الأعمال.
واستكمل: من وأنا صغير بلعب رياضة، ودايمًا نصيحتي الأولى لإخواتي لعب الرياضة، حتى في مسلسلاتي عرب السويركي بدأ بطل وبعدين بقى مدمن ووريت الناس قد إيه المخدرات هدته من بطل وخليته مالوش لازمة، وبعد كده اتكرمت من المركز القومي لعلاج الإدمان.
