عمرو زكي: إحنا بندعم الأندية أكتر من المنتخب.. وحسام حسن مش هيعمل غير الصح
قال عمرو زكي، نجم الكرة المصرية السابق، إن منتخب مصر سيقدم أداءً قويًا أمام زيمبابوي في بطولة أمم إفريقيا.
تصريحات عمرو زكي
وأضاف عمرو زكي في تصريحات لبرنامج الكلاسيكو على قناة أون: اللي بيحصل مع حسام حسن ده ظلم، واتحاد الكرة مش بيحمي حسام حسن.
وأكمل عمرو زكي: دور الإعلام إنه يدعم المنتخب، إحنا بندعم الأندية أكتر من المنتخب.. حسام حسن رمز كبير جدًا، وأنا اشتغلت مع حسام حسن في الزمالك، راجل مش عايز يخسر.
وواصل عمرو زكي: كابتن حسن شحاتة كان بيتخانق، بس وقت البطولة كنا بندعمه، طيب ما إحنا في بطولة ولازم ندعمه.
وأردف زكي: النهاردة مفيش أهلي وزمالك، من حق الناس تشوف المنتخب وتفرح.
واستطرد عمرو زكي: كابتن حسام حسن مش أي حاجة يتعلم عليها، المسؤولية كبيرة، وهو قال محترفين وربع، وممكن خانَه التعبير مش أكتر.
وزاد عمر زكي: حسام حسن مش هيعمل غير الصح، وحسام حسن مثلي الأعلى كرويًا.
واختتم عمرو زكي: إزاي يشتغل على مرموش، وإزاي يشتغل على صلاح، وإزاي يشتغل على مصطفى محمد، لو جاهز مفيش كلام.. ولو إمام عاشور جاهز طبعًا هو اللي يقود نص الملعب ويكون صانع الألعاب.
