أحمد عبد الحميد ينعى والده: كنت حاسس إنه آخر عيد ميلاد ليك.. وحب الناس ليك عزائي الوحيد
استعاد الفنان أحمد عبد الحميد ذكرى آخر عيد ميلاد جمعه بوالده الماكيير محمد عبد الحميد، مؤكدًا أنه شعر حينها بأنه اللقاء الأخير، رغم عدم إدراكهما لما سيحمله القدر.
أحمد عبد الحميد ينعى والده
وكتب أحمد عبد الحميد عبر حسابه بموقع التواصل الاجتماعي فيسبوك: الصورة دي من آخر عيد ميلاد ليك.. وأنا بتصورها معاك كان قلبي بيقولي ده آخر عيد ميلاد ليك وآخر مرة هقدر أفرحك بس ولا أنا ولا أنت كنا عارفين إن فرحك جاي وإن ربنا هيرزقك البداية الأبدية في جنته إن شاء الله بوجه مستبشر كدة زي ما كل اللي ودعوك شافوه.
وتابع: كنت آخر سنين تقولي أنا اتنسيت خلاص يا أحمد ولما أقولك فلان بيقولي سلم لي على الأستاذ تقولى ياااه فيه الخير الحمد لله إنه لسه فاكرني أو لسه فكراني لو شفت حب الناس ليك بعد ما مشيت سواء في خارجتك أو في عزاك أو حتى على صفحاتهم هتعرف قد إيه أنت كنت عظيم وهتفضل تاريخ وهتفضل سيرتك حلوة وساترنا طول ما إحنا عايشين.
وأضاف: بس أنا عارف إن كل ده ولا يشغلك دلوقتي يا عم وأنت منعم في جنة الرحمن مع حبايبك كلهم وهو ده عزائي الوحيد.. ربنا يرحمك يا أطيب قلب وأحسن أب ويجعلني خير خلف ليك وأفضل محافظ على اسمك وسيرتك وأخلاقك الى سايبها في قلوب الناس أشوفك على خير يا حمادة.
