تريزيجيه: تعاهدنا على الفوز علشان محمد هاني ميشيلش الليلة لوحده
تحدث محمود حسن تريزيجيه لاعب منتخب مصر عقب الفوز على جنوب إفريقيا في الجولة الثانية عن المجموعة الثانية لبطولة كأس أمم إفريقيا 2025، والتأهل إلى ثمن النهائي.
تصريحات تريزيجيه
وقال تريزيجيه في تصريحات للصحفيين عقب المباراة بحضور مراسل القاهرة 24: الحمد لله على الفوز، الجماهير كانت محتاجة تفرح وإحنا كمان نفسنا نفرّحهم، لعبنا قدام منتخب قوي ورغم النقص العددي اللاعبين كانوا رجالة.
وأضاف: لحظة مراجعة ركلة جزاء جنوب إفريقيا كانت صعبة ومتوترة، لكن كنا واثقين إن ربنا مش هيضيع مجهود أي لاعب في الملعب.
وأشار تريزيجيه في تصريحاته: الفوز مهم جدًا قدام منتخب كبير، ونجحنا في فرض سيطرتنا على المباراة، والأهم كان تحقيق الانتصار، وكنا قادرين نضيف الهدف الثاني والثالث.
وعن لقطة طرد محمد هاني، أفاد قائلًا: محمد هاني لاعب محترم، اللي حصل غصب عنه ومكنش قاصد، وكلنا كنا على قلب رجل واحد علشان نفوز وميشيلش الليلة لوحده.
وأردف: هدفنا من البداية هو التتويج بلقب البطولة، ومع مساندة الشعب المصري نقدر نحقق الهدف ده، وبناخد البطولة خطوة بخطوة، قفلنا صفحة جنوب إفريقيا وبدأنا التركيز في اللي جاي.
وأكد تريزيجيه: حسام حسن قال لنا بين الشوطين إن المنافس بيلعب بزيادة عددية، وكان لازم نقفل كويس ونطلع بهجمة نخلص بيها الماتش، وحاولنا لكن التوفيق مكانش حاضر، وكل اللاعبين قاتلوا في الملعب، ومن أول يوم وإحنا على قلب رجل واحد من أجل الفوز بالبطولة.
وأتم تصريحاته: محمد الشناوي قدم مباراة كبيرة، وأتمنى له التوفيق مع باقي الحراس، وإحنا فريق واحد، وأي كلام غير كده غير صحيح، كلنا هدفنا واحد وكلنا مصريين وهنفرّح الناس.
