صعبت عليا نفسي وشكلي قدام الناس.. شكوى من عامل دليفيري بسبب رفض أحد فروع بلبن البيع له
زعم عامل دليفري عبر منصات التواصل الاجتماعي رفض مدير أحد فروع بلبن شراء منتج من المحل لارتدائه ملابس عامل دليفري، ما أشعره بالحزن والاستياء الشديد.
عامل دليفيري يشكو بلبن لعدم البيع بسبب زي شركة التوصيل
وشارك الشاب منشورًا عبر حسابه بمنصات التواصل الاجتماعي جاء فيه: والله العظيم كل اللي طلبه أفهم السبب أو حد يرد عليا ويوضحلي ويجبلي البند اللي يمنع أني اشتري حاجة بلبس الشغل بس مش أكتر والموضوع مستفز جدًا تحس أنهم بيستحقروا عامل الدليفري، مدير سألني هتشتري ولا تستلم طلب قولتله لا يا فندم هشتري قلي مفيش مشكلة اشتري.
وأضاف الشاب: ومدير أعلى منه يبعت عامل يبلغ الكاشير أنه ميبعليش، طيب إزاي اقنعني إن فيه مدير فرع معندوش معلومة سياسة مكان أنك متبعتش لعامل لابس طلبات.
وأكمل الشاب: أنا مصورتش الموقف من جوه لأني مش بتاع دوشه ولا مشاكل أنا بس صعبت عليا نفسي والناس كلها بتتفرج عليا وتبصلي علشان عاوز أطلب حاجة بفلوسي أكلها في شغلي وهو رافض ده وكمان بيقولي مش أنت جيت إمبارح يعني المشكلة مش في الجاكيت بقي ده فيا أنا مثلا.
