دينا نجم مؤلفة لا ترد ولا تستبدل: كتبت المسلسل بعد خضوع صديقي لزرع الكلى.. والعمل مخاطرة كبيرة
كشفت المؤلفة دينا نجم، تفاصيل رحلة كتابتها مسلسل لا ترد ولا تستبدل، بطولة الفنانة دينا الشربيني، والفنان أحمد السعدني، الذي عٌرض الفترة الماضية وحقق نجاحًا كبيرًا منذ عرض أولى حلقاته.
وكشفت دينا نجم، عبر حسابها على فيسبوك، كواليس كتابتها مسلسل لا ترد ولا تستبدل قائلة: خلصت حكاية قريبة من قلبي -لا ترد ولا تستبدل- الحكاية بدأت من 4 سنين، تحديدا في يناير 2022، لما عرفت أن صديق ليا اكتشف أن عنده مشكلة كبيرة في الكلى.. وبعدها بفترة عمل عملية زرع وبقى كويس الحمد لله.
وواصلت: في أبريل 2023، صديقي بعت لي يسألني إذا كنت فكرت أكتب عمل درامي عن تجربة غسيل الكلى والزراعة.. رديت عليه بـ screenshot من النوتس عندي في الموبايل أني كاتبة الموضوع دا ضمن مجموعة مواضيع نفسي أكتب عنها.. عرضت الفكرة على سمر، أختي وشريكتي في الكتابة، تحمست جدا ومن هنا بدأت الرحلة.. زيارات لا تنتهي للمستشفيات والعيادات.. قعدات طويلة مع دكاترة في تخصصات مختلفة.. قعدات مع مرضى عدوا بالتجربة الصعبة دي.. زيارات لوحدات الغسيل.. قعدات مع متبرعين خاضوا التجربة بالفعل.
وأضافت: يمكن كانت أطول وأصعب رحلة بحث عديت بيها من أول ما بدأت أكتب رغم أني بعمل ده في كل مسلسل بشتغل عليه بس بسبب صعوبة الموضوع وإحساسنا بالمسئولية أننا نوصل الحاجات زي ما هي بالظبط في الحقيقة، استثمرنا كتير جدا في مرحلة البحث ما قبل الكتابة، وده ينطبق كمان على البحث في مشكلة مكة اللي كانت برضه بالنسبة لنا مهم انها توصل على حقيقتها، بعدها أخدنا أنا وسمر قرار جريء شوية.. وهو أننا نكتب المسلسل من قبل ما نبقى متعاقدين على تنفيذه.. وكانت مخاطرة كبيرة.. بالذات عشان طبيعة المسلسل وصعوبته.. بس إحنا كنا حابين ناخد كل وقتنا في خلق العوالم ورسم الشخصيات بكل تفاصيلها وأبعادها وكتابة الحلقات حسب تصورنا إحنا.. عملنا كده فعلا.
واستكملت: كتير جدا واحنا شغالين، بيجيلنا التساؤل المخيف: ماذا لو؟ ماذا لو المسلسل عمره ما اتعمل؟ لو قالوا لنا كئيب؟ لو مفيش ممثلين تحمسوا له؟ لو مفيش مُخرج حب المشروع؟ أسئلة كتير وشكوك كبيرة كانت بتطاردنا طول الوقت ومراحل إحباط أحيانا ولحظات من اليأس ثم لحظات من الأمل بس الثابت في كل ده اننا كنا دايما بنطمن بعض أنا وسمر ان مفيش مجهود بيضيع عند ربنا.. البوست ده إهداء أولا لصديقي.. اللي كان الملهم الأول ليا.. بدعي له بالصحة طول العمر وبشكره من قلبي على كل مساعدته.
واختتمت: إهداء لكل من يعاني من أي من الأزمات اللي اتقدمت في المسلسل أنتم الأبطال الحقيقيين، ويا رب نكون قدرنا نعبر عن معاناتكم بشكل خلاكم تحسوا أنكم مش لوحدكم وأنكم متشافين ومسموعين ومتقدرين.. بنحبكم جدا.
