المخرج محمد دياب: عرض فيلم أسد في العيد الكبير.. وأتمنى يبقى تجربة مختلفة للجمهور
كشف المخرج محمد دياب موعد عرض فيلم أسد بطولة الفنان محمد رمضان، موضحًا أنه سيعرض في موسم أفلام عيد الأضحى المقبل 2026، وذلك بعد فترة تصوير دامت عام ونصف.
وقال محمد دياب، في تصريحات تليفزيونية: مضيت فيلم أسد مع محمد رمضان بقالي 6 سنين، مبسوط بيه وحاسس إننا عملنا مجهود، كان معايا فريق عمل وإنتاج جامد وممثلين خطيرين.
وأضاف: حاسس إن ربنا هيوفقنا، وبدعو الجمهور يشوف الفيلم في العيد الكبير إن شاء الله هيبقى ده وقت نزوله، وأتمنى لهم تجربة مختلفة ويا رب يعجبهم، في الآخر إحنا بنعمل اللي علينا والجمهور ليه ذوقه، وأتمنى ده يكون مناسب ليهم.
محمد دياب: محمد رمضان مقصرش يوم في تصوير فيلم أسد
كما تحدث المخرج محمد دياب عن تعاونه مع الفنان محمد رمضان، في فيلم أسد، قائلًا: أحد أسباب إن فيلم أسد اتعطل 6 سنين إن محدش كان راضي ينتجه، كانت الناس شايفة أنها مخاطرة كبيرة لغاية ما قررت شركة الإنتاج تقديمه وخدوا مخاطرة رهيبة الفيلم يكاد يكون معدي الـ 7 أو 8 ملايين دولار وده رقم كبير جدًا في مصر، أنا عليا ضغط كبير لأن توفرلي كل أسباب النجاح، وإن شاء الله الفيلم ينجح، والناس تحس بقيمته الفنية والمادية.
واختتم المخرج حديثه قائلًا: محمد رمضان طلع عليه سمعة معينة، ولكن أنا تجربتي الشخصية أنه راجل في منتهى الالتزام بنصور بقالنا سنة ونص ملتزم بالسيف مفيش يوم قصر معايا وكان مثال لزملائه والتجربة لما بتبقى جد من أولها الكل بيحترمها.
