أنا أم بديلة ومش مكسوفة.. سيدة تروي رحلتها مع كفالة صغير مريض بالتوحد رغم ظروفها الصحية

تعيش انتصار مصطفى حياة مليئة بالتحديات والحنان، في قلب الصحراء الغربية بمدينة الخارجة بمحافظة الوادي الجديد، بعدما مرت بزواج فاشل وانفصال، لكن قصتها الحقيقية بدأت حين قررت أن تمنح طفلًا حنانها ورعايتها، رغم كل الظروف الصعبة.

انتصار مصطفى تروي رحلتها مع كفالة صغير توحد وتحدي الإعاقة

وقالت انتصار لـ القاهرة 24: زي أي واحدة في ظروفي دي لما بتيجي تتجوز لا تحسن الاختيار، أنا اتجوزت مع إنّي ما كنتش عايزة، وجوازي كان فاشل من البداية، وأصريت أنجحه ما عرفتش، وفي النهاية فشلت.

وأضافت: بعد الطلاق، جاء قرار غير متوقع ليغير حياتي بالكامل بكفالة طفل، موضحة: كفلت ابني ده علشان خاطر أنا في الفترة اللي كنت متجوزة فيها ما خلفتش.

كفالة صغير رغم ظروفها

وأكملت: تكفلت بهاني، رغم ظروفي الصحية الصعبة، حيث عانيت منذ طفولتي من ارتخاء في أعصاب الوجه، وعيني بها ارتخاء في الأعصاب، وطلع لي زي فص في خدي، الدكتور لما جه يشيله لمس الأوتار أو الأعصاب، وبالتالي ما فيش أعصاب بتشد الخد تاني.. ده التشخيص اللي الدكتور قال عليه واللي أنا ماشية عليه لحد دلوقتي.

وواصلت: أجريت عدة عمليات جراحية لم تنجح، ورغم ذلك أربي هاني وكأني خلفته وأمه الحقيقية، أنا بحبه أوي وما فيش فرق بيني وبين الأم اللي خلفته.

سمات التوحد وظروف قاسية

وأفادت: حين لاحظت سمات طيف التوحد على هاني، لم أتراجع وبدأت أوديه جلسات تخاطب وبعد كده عرفت هم بيعملوا إيه في جلسات التخاطب مش أكتر من اللي هتعمله الأم، وده اللي أنا عملته معاه الحمد لله، دلوقتي خرج من المرحلة دي وأصبح أحسن كتير جدًا وأنا راضية.

وأضافت: الحياة لم تمنحني أمانًا ماديًا بعد الطلاق. عشت في بيت والدي، ومرتبي لم يكن كافيًا، لكن قررت تحدي الظروف، موضحة: قررت أربي ابني وأحسن تربيته، أنا عايشة في بيت أبويا، حتى الشقة ما عنديش. نفسي إنه يطلع في الحياة مش زعلان مني، ونفسي الناس تعرف حالتنا أنا وابني.

على الرغم من العزلة ونقص الأصدقاء، تقول: عشت طول عمري ما عنديش أصحاب في حياتي خالص، مش عشان أنا وحيدة أو منعزلة، لا، ولكن عشت في حالي.

واختتمت: أدعو كل من يستطيع احتضان أطفالا من الملاجئ إنه يجيبهم ويربيهم، ونفسي ابني يكبر وهو فرحان، ويحس إن ليه أم بتحبه وبتدافع عنه.. نفسي الناس تعرفنا على حقيقتنا.