ماهر محسن مدرب أحمد مالك في سوا سوا: تدرب 4 أشهر للوصول إلى دور لاعب برازيلي محترف | حوار
كشف ماهر محسن عبد الغني، المدرب الخاص لأحمد مالك، ضمن أحداث مسلسل سوا سوا، والمقرر عرضه في السباق الرمضاني لعام 2026 كواليس تدريبه لـ الأخير، والصعوبات التي واجهتهم خلال فترة التحضير، بالإضافة إلى طبيعة الدور الذي تطلّب مجهودًا بدنيًا ونفسيًا كبيرًا، والتحديات التي فرضها التصوير المكثف، مؤكدًا أن أحمد مالك أبدى التزامًا وانضباطًا لافتين انعكسا بشكل واضح على أدائه داخل العمل.
وإلى نص الحوار:
في البداية حدثنا عن كواليس تحضيراتك لـ أحمد مالك لتجسيد دور لاعب كرة قدم ضمن أحداث مسلسله سوا سوا.. هل كانت التحضيرات صعبة؟
أكيد كانت صعبة ومش سهلة خالص، خصوصًا إننا في التمرين الأول والتاني كنا بنجرب نشتغل على الرجل اليمين والشمال علشان نحدد هو أيمن ولا أشول.. وبعد ما لاحظنا إن رجله اليمين أفضل شوية، قررنا نركز عليها.
هل تأقلم أحمد مالك مع التدريبات سريعًا؟
الأمر كان جديدًا عليه وفي الفترة الأولى كان بيجيله شد عضل بشكل كبير لأنه ملعبش كورة قبل كده، وكل الحركات كانت جديدة ومفاجئة لعضلاته.
ماذا عن كواليس التمرين بينكما؟
الكواليس كانت لذيذة جدًا وأحمد مالك شاب وسننا قريب من بعض، فبناخد الأمور ببساطة، ووقت التمرين شغلنا بيبقى جد، وفي الاستراحة بنقعد نفكر مع بعض شكل الاحتفال بعد الجون هيبقى إزاي علشان يطلع واقعي ومقنع كرويًا.
التحضيرات استمرت وقت قد إيه؟
خدنا حوالي 4 أشهر، من أول شهر 10 لحد شهر 1 كان بيتدرب يوم ويوم، وهو كان مجتهد جدًا، وأحيانًا كان بيكون عنده تصوير 14 ساعة، يخلص ويرجع على التمرين من غير تردد.
كلمنا عن شخصية اللاعب اللي هتقدمه لأحمد مالك في المسلسل؟
هيظهر بدور لاعب برازيلي عايش في منطقة شعبية، والتفاصيل دي الجمهور هيفهمها أكتر لما يشوف المسلسل.
هل خلفيته الرياضية أثّرت على التحضير؟
طبعًا رمضان اللي فات كان مركز في رياضة الملاكمة، ودي مختلفة تمامًا عن كرة القدم لدرجة إن أول شهر تمرين قضيناه بنغيّر وقفته من وقفة ملاكم لوقفة لاعب كورة.
هل اتعرض عليك الظهور واللعب معه في المسلسل؟
بالفعل اتعرض عليا أظهر وألعب معاه، بس أنا رفضت وفضّلت أكون برا الكادر ووجودي خارج الصورة بيديني رؤية أوضح وتركيز أكتر مع مالك، لأن نجاحي الحقيقي هو إنه يطلع بشكل كويس، مش إني أظهر.
في النهاية إيه الرسالة اللي تحب توجهها لأحمد مالك؟
دايمًا بقوله «ربنا يديك على قد تعبك»، لأنك فعلًا بتتعب جدًا وبتدي كل حاجة حقها وده سبب نجاحك.
