محمد صبحي: حياتي الشخصية متخصش حد ومش هقدمها.. ولا يصح أقدم سيرة فنان إلا إذا كتبها في مذكراته
كشف الفنان محمد صبحي، عن موقفه من تقديم سيرته الذاتية في عمل فني،موضحًا أنه يرفض مبدأ تناول الحياة الشخصية، لكنه مع تقديم السيرة الفنية من الناحية المهنية دون المسائل الشخصية.
وقال محمد صبحي، في لقاؤه مع القاهرة 24:مش هقدم سيرتي الذاتية في عمل فني نهائيًا، ممكن أوافق على تقديم سيرتي الفنية فقط لكن حياتي الشخصية محدش ليه دعوة بيها ولا تخص أحد.
وأضاف: ولا يصح أقدم سيرة ذاتية إلا إذا كان الفنان كاتبها في مذكراته وهو المسؤول عنها.
وتابع محمد صبحي: قضيتي من أول ما بدأت من السبعينات أني مبقدمش أي حاجة وخلاص، وأول حاجة بتتكتب في الصفحة بعد بسم الله الرحمن الرحيم، ماذا أريد أن أناقش الناس فيه؟، لازم تبقى قضية محتاجة وعي علشان يوصل الوعي.
محمد صبحي
وعلى جانب آخر، سبق وتحدث محمد صبحي، عن تفاصيل مرضه خلال الفترة الماضية، حيث قال في لقائه مع الإعلامية لميس الحديدي: فيه ناس عايزة تركب التريند علشان كده طلعت شائعات وفاتي، ولكن أنا بقول إن الموت ده نعمة، وبستغرب لما بلاقي أخبار وفاة ممثل شهير واسمه في أول تعليق، وحفيدتي كانت بتعيط لما بتشوف الأخبار دي.
وأضاف محمد صبحي: كان عندي فيروس بيعيش في المخ 14 يوما والموضوع بينتهي، ولكن العلاج بالنسبة لي كان قاسيا جدا، فضلا على أن الموضوع اتكرر مرتين وكنت عايز أموت علشان أجرب الحياة الأخرى، وبعتقد إن حياتي بروفه.
