يطالب بموافقة قانونية وشرعية.. طبيب نساء وتوليد يشخص فتاة بمتلازمة نادرة تتطلب زراعة رحم
نشر طبيب منشورًا له عبر حسابه بموقع التواصل الاجتماعي فيسبوك، حول تشخيص فتاة تبلغ من العمر 16 عامًا، بمتلازمة ماير روكيتانسكي كوستر هاوزر، وهي حالة مرضية نادرة تتضمن وجود عيب خلقي يصيب النساء، وتتسبب في غياب الرحم أو عدم اكتمال نموه، وطالب الطبيب بالموافقة على تسهيل زراعة الرحم.
طبيب نساء وتوليد يشخص فتاة بمتلازمة نادرة تتطلب زراعة رحم
وقال الدكتور علي الحداد، استشاري الحقن المجهري والمناظير، في منشور له عبر حسابه بموقع التواصل الاجتماعي فيسبوك: البنت مولودة من غير رحم وعندها 16 سنة، وأنا استأذنت من الأم إن أكتب البوست دا، البنت مشكلتها بسيطة.. عندها 16 سنة ولحد دلوقتي الدورة الشهرية مجتش ولا مرة، رغم إن البنت شكلها الأنثوي سليم، ومفيش مشاكل كرموسومات، الأم قالت لي كشفنا كتير والدكاترة قالت البنت كويسة ومسألة وقت، شوفتها عالسونار خرجت البنت برا وقولت للأم أنا مش شايف الرحم، من فصلك هنعمل رنين وفعلا عملت الرنين وتأكدنا للأسف البنت مولودة بدون رحم، رغم وجود مبيضين، ودي متلازمة موجودة لكن نادرة، الأم طبعًا كانت في صدمة.
وتابع الطبيب علي الحداد: كان ممكن ببساطة أستسهل زي كل اللي كشفوا عليها قبل كدا ومجهزين الرد من قبل مابيبصوا على السونار، إن البنت كويسة والبريود شوية وهتيجي، وطبعا لو البنت سمعت كلامهم البريود مش هتيجي ولا بعد 100 سنة، والأم قالت أنا بنتي دي شافت مآسي كتيرة أوي، وكنت منتظرة تتجوز وتفرح وتكون أسرة.
وأكمل الطبيب: الأم سألتني وهي بتغالب دموعها سؤال مهم جدًا.. مفيش حل للموضوع دا؟ مينفعش أتبرعلها بالرحم بتاعي؟ قولتلها ينفع وأنا بفضل الله أعتقد إني اقدر أعملها، ورأيي إنها عملية مش صعبة، وطبعًا معملتهاش قبل كدا، بس أنا أعتقد إني قدها، ولكن الدولة مش منظمة قانون الموضوع دا ومفيش فتوى شرعية.
وأضاف الطبيب: الأم شخصية قوية وواضح إنها متعلمة، قولتلها لو عايزاني أساعدك في الموضوع دا، ونكلم حد من أعضاء مجلس التواب، يتقدم به كمقترح قانون، أو علي الأقل نتكلم عنه في الإعلام أو تعملي جروب على فيسبوك لبنتك واللي زيها، وأنا معاكم يمكن نقدر نغير حاجة ونساعد البنت دي واللي زيها.. مش مطلوب غير فتوي بس من الأزهر والدولة توافق.
