وحياة أمي هرنك علقة.. سيدة تستغيث من زوجة شقيقها بطنطا: بتهددني بالضرب وكسرت علينا الباب الحديد
استغاثت سيدة تدعى منى لطفي، من محافظة الغربية، من زوجة شقيقها وأبنائها، بزعم تهديدهم لها ومحاولة التعدي عليها بالضرب داخل مسكنها، بسبب خلافات أسرية.
سيدة تستغيث من زوجة شقيقها بطنطا: بتهددني بالضرب وكسرت علينا الباب الحديد
وزعمت منى لطفي، صاحبة الاستغاثة من زوجة شقيقها، في تصريحات لـ القاهرة 24 قائلة: زوجة أخي يوميًا تهددني بالضرب وقالتلي في نص الشارع هرنك علقة، ووثقت دا بفيديو، وحررت ضدها محضر في قسم تاني طنطا، لأن مش أول مرة تحاول تتعدى عليا بالضرب، وكل يوم والتاني عاملة لنا مشاكل وفضائح.
وادعت صاحبة الاستغاثة: زوجة أخي بتتهجم علينا بقالها كتير، وبتستعرض قوتها عليا هي وأولادها، والسبب خلافات أسرية وهي قاعدة معانا في نفس البيت، وعاملة تمكين من الشقة بالنصف بالرغم من عدم طلاقها من شقيقي.
وأضافت في مزاعمها: الشهر اللي فات رفعت قضية خلع على شقيقي، وأولادها معملوش حساب صلة الرحم مكرهاهم فينا، وبنطالب إنها تبعد عننا لأنها كل يوم والتاني بتعمل مشكلة جديدة، وبتعطل الأسانسير والبيت فيه ناس مسنة لا بنعرف نطلع ولا ننزل بسببها، وآخر مشكلة لقيت ابن أخويا ماسكلي السكينة وكان عايز يضربني بها ومعملش احترام لعمته، ومرات أخويا كسرت علينا الباب الحديد علينا قبل كدا.
