كنت لابسة طويل وبكم.. مريم شوقي صاحبة واقعة التحرش في المواصلات العامة: معرفوش وضربني بالحجارة
قالت مريم شوقي، صاحبة واقعة التحرش في المواصلات العامة، في أول ظهور لها بعد تصدرها التريند، إن الشاب الذي ظهر في الفيديو كان يتتبعها مؤكدة: مشي ورايا في الشارع والناس كلها شافت الموقف ومحدش فيهم قالي اهدي أو حاول يحل الموقف، أنا شوفته بيكلم حد في الموبايل وبيدي له مواصفاتي، وخوفت ليضربني، وأنا معرفوش وضربني بالحجارة.
مريم شوقي صاحبة واقعة التحرش في المواصلات العامة: أنا كنت لابسة بكم وطويل
وأضافت مريم شوقي، في تصريحات خاصة لـ القاهرة 24: الراجل الكبير اللي ظهر في الفيديو دا ممكن يكون جد وأب، ولكن محاولش الدفاع عني، بالعكس انتقدني، ولكن دينّا ما أمرش بكدا، هو لو شاف حاجة غلط فيا يغض البصر، أنا واجهت موقف صعب، والتحرش مش مرتبط باللبس أو السن والمظهر، وأنا مش بتاجر بـ نفسي ومش بعمل تريند وأقول للناس تعالوا اتفرجوا عليا.. أنا عايزة أجيب حقي.
وأضافت مريم شوقي، صاحبة واقعة التحرش في المواصلات العامة، أنا نازلة من شغلي وكنت لابسة بكم وطويل، اللبس مش مبرر للتحرش، ولا سبب، ما فيه تحرش بالأطفال والمنتقبة والمحجبة، إحنا بلدنا أحسن من كدا بكتير، ومن أخطأ يعاقب، الستات في مصر ملكات عيب اللي حصل دا، محدش ليه دعوة كنت لابسة إيه، أنا خايفة أنزل شغلي تاني يتربص لي.
واستكملت: تهجم عليا بسبب تصويري له، ومفيش بنت هتطلع تقول تم الاعتداء عليّا بالضرب وهي مش على حق، وفي الآخر ابتسم عشان يوضح إنه راجل مش هامّه، مش هروح شغلي تاني العمر واحد، أنا مش بربي الناس ولكن ليا حق، وأهلي بيدعموني وأنا اتربيت إني أعرف أجيب حقي كويس.
