حبس المتهمين بقتل صاحب شركة تأجير سيارات في فيصل 4 أيام على ذمة التحقيقات
قررت جهات التحقيق المختصة، حبس المتهمين في واقعة مقتل حازم حمدان صاحب إحدى شركات تأجير السيارات بمنطقة فيصل، 4 أيام على ذمة التحقيقات.
حبس المتهمين بقتل صاحب شركة تأجير سيارات بفيصل 4 أيام
وتمكنت الأجهزة الأمنية من القبض على المتهمين في واقعة مقتل حازم حمدان صاحب إحدى شركات تأجير السيارات بمنطقة فيصل، بعد أن تحولت قعدة صلح بسبب مشاجرة مع أحد عمال مطعم سي جمبري ونجل خال المجني عليه يعمل بذات المطعم إلى جريمة.
وروى أحمد ربيع، ابن عمة المجني عليه حازم حمدان وشاهد العيان على الواقعة تفاصيل الساعات الأخيرة في حياة صاحب شركة كيان لتأجير السيارات، الذي لقي مصرعه خلال جلسة صلح أمام مطعم سي جمبري بمنطقة فيصل.
وقال أحمد ربيع في تصريحات خاصة لـ القاهرة 24: البداية كانت إن أخويا شغال في مطعم سي جمبري، وحصلت بينه وبين عامل هناك خناقة، وقتها الناس مسكوه وقالوا إنهم بيحوشوا، وضربوه وعوروه في رقبته وعدت على كده، ورحنا هناك نشوف الموضوع قال ده اتخانق مع راجل كبير قد أبوه ومشي ولو عايزين تيجوا تعالوا بكرة، وتاني يوم رُحنا للمحل علشان نحل المشكلة بالذوق، وقلنا ده راجل كبير ومش عايزين مشاكل.
وأضاف: إحنا كنا قاعدين قدام المحل ومستنيين صاحب المكان يوصل علشان نتصالح، وهو قال إنه جاي في الطريق، لكن الصنايعية فضلوا يشتموا فينا، وإحنا كنا ساكتين احترامًا لصاحب المحل.
وأكمل ابن عمة المتوفى: أول ما وصل أحمد. ش صاحب مطعم سي جمبري، لقينا حوالي 14 واحد نزلوا علينا مرة واحدة، ماسكين سنج وسواطير وبواني، واستلموا حازم ضرب، وصاحب المحل ضربه في رجله لحد ما اتصاب في العرق اللي بيوصل للقلب.
وواصل: حازم كان راجل محترم ومالوش في المشاكل، ومعاه أربع عيال صغيرين ملهمش غيره، وكان كل همه يخلص الخلاف بالصلح مش بالخناق، واختتم حديثه بقوله: إحنا عايزين حق حازم بالقانون، لأنه مات غدر قدام المحل وهو رايح يصلح مش يتخانق.
