مي فاروق: شعرت برحيل أمي قبل وفاتها بـ40 يوما.. وكانت خايفة تدخل النار لأني بغني
كشفت المطربة مي فاروق، تفاصيل الفترة الأخيرة في حياة والدتها، موضحة أن والدتها شعرت بقرب رحيلها قبل وفاتها بـ 40 يومًا، مؤكدة أنها نفذت وصيتها طبقًا لرغبتها.
وقالت مي فاروق، في تصريحات تليفزيونية: أمي توفيت وأنا عندي 21 سنة، وكانت أول وأكبر فقد في حياتي، صدمة غير متوقعة من كتر ما كنت شايفاها قوية، ومعرفتش أفهم ليه توفيت طبعًا استغفر الله دي أقدار وأعمار ولكني ساعتها كنت شايفة إن دي الوحيدة اللي هتفضل جنبي وكانت أول واحدة مشيت، وساعتها كنت متحملة مسؤولية حاجات كتير وشفتها وهي بتتعب، وفي الفترة الأخيرة كل حاجة جت بسرعة وقبل وفاتها بـ40 يوما كنت حاسة إنها هتتوفى.
وتابعت مي فاروق: قبل وفاة أمي طلع كلام إن هتدخلوا النار علشان بنتكم بتغني، وهي كانت دايمًا بتخاف وبتقولي أنا ممكن أدخل النار علشان أنتي بتغني؟، قلتلها ربنا مبيعملش في حد كده وحساباته مختلفة، وهو اللي إداني الموهبة ولو مش عايزني مش هيوفقني، قبل الوفاة بأسبوع قالتلي أنا عارفة أنك بـ100 راجل، وعارفة أنتي مين كويس أوي، وأنا مبسوطة بيكي، دي كانت أول مرة ماما تقولي كلام فيه حنية، وقالتلي إنها بتخاف عليا من كتر حبها فيا لأنها معندهاش غيري، ولما سمعت الكلام ده كنت زعلانة لأني كنت عارفة أنها هتمشي ومش هتكمل.
وأكدت مي فاروق أنها نفذت وصية والدتها، موضحة: أيام ودخلت في كومة وكنت أنا اللي مسؤولة عن كل حاجة في التوقيت ده، لأنها كانت موصياني من صغري لو حصلها حاجة أنا اللي أبقى المسؤولة عنها في كل حاجة وأنا اللي أتحكم وأنا اللي أبقى موجودة في الغُسل مش حد غيري، ونفذت لها كل اللي هي كانت عايزاه بما يرضي الله ومشيت وهي مرتاحة ومبسوطة وراضية عني.
واختتمت مي فاروق: مش عارفة بعد وفاة أمي عديت إزاي، السنين اللي بعد أمي أنا مش فاكرة تخطيت وفاتها إزاي، أنا كنت بسمع صوتها طول الوقت في البيت بتنادي عليا.
