ضربها بخرطوم الأنبوبة.. فتاة تستغيث من تعدي مختل عقليا بالضرب على والدتها المسنة بالمنوفية: بنطالب بدخوله المستشفى لعلاجه
استغاثت فتاة تدعى عائشة وصال، من قرية كفر أبو الحسن التابعة لمركزقويسنا بمحافظة المنوفية، من تعدي شخص مختل وغير متزن عقليًا بالضرب على والدتها المسنة صاحبة الـ 70 عامًا.
وقالت لـ القاهر 24: إن المتهم أحد أبناء قريتها ع. ف يبلغ من العمر 40 عامًا، ويعاني من مرض عقلي، حيث ضرب والدتها أثناء سيرها في الشارع بالقرب من منزلها.
فتاة تستغيث من تعدي مختل عقليا بالضرب على والدتها المسنة بالمنوفية: بنطالب بدخوله المستشفى لعلاجه
وأكملت: الواقعة حصلت يوم الجمعة الساعة 8 صباحًا، ووالدتي مبتخرجش من البيت إلا كل فين وفين، ولكن اليوم دا خرجت تشتري مستلزمات للبيت من آخر الشارع اللي ساكنين فيه، وهي راجعة للبيت لقيت الشاب دا واقف في الشارع وجري ناحيتها شد من إيدها اللبن والسكر اللي كانت شارياهم ورماهم في الأرض، وتعدى عليها بالضرب بخرطوم أنبوبة.
وأضافت ابنة المجني عليها: احنا مفيش ما بينا وبينه أي مشاكل، ولكن هو مسبب ذعر وخوف لكل الأهالي في القرية بسبب حالته العقلية، هو غير متزن نفسيًا وعقليًا، وعلطول واقف في الشارع بالسكينة أو عصا أو أي حاجة يضرب بها الناس، هو مش داري بتصرفاته، وله أكتر من واقعة سابقة في قريتنا وعدة قرى مجاورة بالتعدي بالضرب على الناس، والدتي حياتها كانت معرضة للخطر، ولكن اللي أنقذها من إيده جارنا، هو اللي تدخل وبالعافية قدر ينقذها من إيده، وخاصة إنه عنيف، وروحنا المستشفى بوالدتي، والتقرير الطبي أثبت تعرضها لكدمات وتجمعات دموية، وتقطيع جلد يدها وإصابات بالغة في اليد السرى، نتيجة تعرضها للضرب.
وتابعت: حررنا محضر بالواقعة، بقسم شرطة قويسنا برقم 3066، والكل عارف إنه مختل عقليًا، ولكن أهله مش مهتمين إنه يتعالج أو يدخل دار رعاية متخصصة في التعامل مع حالته، والبلد كلها بتطالب إنه يدخل مستشفى لعلاج الأمراض النفسية والعقلية، ولكن أهله مش مستجابين بالرغم من إنه مسب زعر وخوف وقلق لكل الأهالي، البلد فيها أطفال رايحة الدروس والمدارس، وستات رايحة لشغلها، محتاجين إنه يدخل مصحة متخصصة لحالته، لإنه متسبب في ترويع المواطنين، وكل الناس كانت بتتعاطف معاه ومع أهله، ولكن الوضع تطور.
واستكملت: والدتي حالتها النفسية سيئة بعد واقعة التعدي عليها بالضرب في الشارع، إحنا مش بنطالب غير بالأمان وعدم الخوف، ولا عايزين يتطبق عليه حكم ولا يتسجن ولا القانون ياخد مجراه، بالعكس عايزينه يدخل مستشفى ويتم التعامل مع حالته العقلية بشكل متخصص، لإن من الضروري السيطرة على حالته العقلية وعلاجه.
