قولتله تعالى نهرب لأننا مش هنعرف نعيش بعيد عن بعض.. أقوال خطيبة المجني عليه سابقا بواقعة ميت عاصم| خاص
يستكمل القاهرة 24 نشر التحقيقات في واقعة إجبار شاب بقرية ميت عاصم التابعة لمركز بنها بمحافظة القليوبية على ارتداء ملابس نسائية في القضية المعروفة إعلاميا بـ بدلة الراقص.
أقوال خطيبة ضحية واقعة ميت عاصم سابقا
وحصل القاهرة 24 على أقوال ر. ا. ف، خطيبة المجني عليه سابقا، بسؤالها ما معلوماتك بشأن الواقعة محل التحقيق؟
ج: اللي حصل إن أنا وإسلام أصحاب بقالنا سنتين بنحب بعض بس ما قولناش لبعض وأنا اتخطبت لواحد غصب عني اسمه محمود وإسلام كان خاطب هو كمان وكان عايزني أنا ماكنش عايز الخطوبة اللي هو خاطبها دلوقتي، وكلمت إسلام يوم الثلاثاء الموافق ٢٠٢٦/۲/۱۰ حوالي الساعة ٤.٣٠ العصر وقولتله تعالى نتقابل أنا وأنت في كافيه علشان عايزة أقولك على حاجة، وروحت كافيه في الاهرام وقابلت إسلام وقولتله إن أنا وأنت بنحب بعض ومش هنعرف نعيش من غير بعض تعالى نهرب وتبعد عن البيت ونروح حتة تانية.
وأكملت: بعد کده أخذت إسلام وروحنا قعدنا في كافيه تاني وطلبنا أكل وكنا كويسين وبعد كده روحنا على المحطة وحجزنا تذكرتين وروحنا إسكندرية وقعدنا هناك وماكنش معانا فلوس روحت بعت التليفون بتاعي بمزاجي علشان نقعد شوية ونعرف نخرج وقعدنا هناك من الساعة 7 صباحا لحد الساعه 1 صباحا تاني يوم الأربعاء وبعد كده رجعنا روحنا عند ابن أخته وقعدنا هناك أنا وهو وجت أخته خدتني علشان توديني بيت أهلي وبعد كده أهلي راحوا جابوه من بيته وقعدوا يضربوا فيه وصوروه وبعد كده الحكومة جت خدتنا وروحنا على المركز.
س: متى وأين حدث ذلك ؟
ج: إحنا بنتكلم أنا وإسلام من حوالي سنتين وقابلنا بعض يوم الثلاثاء الموافق ٢٠٢٦/٢/١٠ حوالي الساعة ٤.٣٠ العصر واتفقنا نروح إسكندرية وروحنا فجر الأربعاء الساعة ٤.٣٠ صباحا وصلنا الساعة ٦.٣٠ إسكندرية وقعدنا في إسكندرية لحد الساعة 1 صباحا تاني يوم وأخته جت ودتني لأهلي بعد الظهر وبمجرد ما روحت لقيتهم جايبين إسلام وعملوا اللي حصل وضربوه وصوروه.
س: ما هي طبيعة علاقتك بالمدعو إسلام محمد أحمد محمد؟
ج: إحنا أصحاب من سنتين ومن بلد واحدة وكنا بنتواصل على الفيس والواتس وهو بياخد رأيي في الصور وإحنا كنا بنحب بعض الفترة دي بس ماقلتش، وأنا كنت مخطوبة وهو كان خاطب بس إحنا كنا بنحب بعض وما كناش راضيين عن الخطوبة بتاعتنا.
