ألم والتئام

التعافي، أي تعافي بيحتاج وقت وتجربة جديدة.. قفل الباب قدام كل الناس لمجرد إن شخص واحد طلع سيء هو قرار خاطئ وبيحذف منك صفة الإنسانية!.. إنسان يعني تجرب وتغلط، وتقع، وتقوم.. لو الحل دايمًا هو قفل الباب يبقى ماكنش حد غِلب، ولا كانت الحياة كملت.. الآنسة "ديبورا والسن" الطالبة الجامعية في جامعة جورج واشنطن بتحكي في مقال إنساني تم نشره في عدة صحف وكتب منهم كتاب Soul The For Soup Chicken إنها كانت خارجة من تجربة عاطفية سيئة.. كانت مخطوبة لواحد اسمه "تيد" كان لاعب في فريق السلة بتاع الجامعة.. "ديبورا" كانت عضوة في فريق المسرح في الكلية وبتعشق التمثيل وكان المفروض إن فيه عرض مسرحي هيتعمل بعد شهرين، المشاكل بين "تيد" و"ديبورا" ظهرت من لا شيء وبدأت تكبر زي كورة التلج بدون سبب حقيقي ملموس.

بس اللي يدقق هيعرف إن "ديبورا" ماكنتش مقصرة في حق العلاقة بالعكس ده كان تقصيرها في حق نفسها لصالح استمرار العلاقة دي.. "تيد" يكلمها تعالي نخرج رغم إن بيكون عندها في نفس الوقت مذاكرة أو تمرين للمسرح لكن بتوافقه وتخرج معاه!.. شوية الوقت اللي المفروض تخطفهم عشان تريح فيهم كانوا بيبقوا ليه هو، كعادة كل شخص أناني بياخد من اللي قدامه كل حاجة حلوة ويسيبه على الحديدة من ناحية المشاعر، على النقيض تمامًا هي ماكنتش بتلاقيه في اللحظات اللي بتحتاجه فيها، لما كان يكلمها ويلاقيها متضايقة ومخنوقة زي لحظات الخنقة والقرف الطبيعية اللي بتيجي للناس كلها فجأة؛ كان يتهرب إنه يسمعها! هو باعد نفسه عن أي مشكلة أو أزمة ليها ودايمًا عايز "ديبورا" الفرفوشة الجميلة اللي بيتباهي بيها وبجمالها قدام أصحابهم وهو أنا اللي خطفت قلب فلانة.. كان لازم بشكل أو بآخر العلاقة دي تنتهى لأن مفيش عطاء من طرف واحد بيستمر، كلمة النهاية نزلت على قصتهم بعد موقف كان في قمة السخافة حصل من "تيد" لما كانوا ماشيين سوا كـ شلة أصحاب في الشارع رايحين مكان معين، و"ديبورا" كانت ماشية مع بنتين تانيين قبل المجموعة اللي فيها "تيد".. "ديبورا" كانت حاطة في ودنها سماعات الـ MP3 وشعرها مغطي على السلك بالتالي اللي ماشيين وراها مش شايفين التفصيلة دي.

 "تيد" كان بيتكلم مع أصحابه عن موقف ما وراح باصص لـ قدام نده على "ديبورا" وقال: أليس كذلك؟.. بيسألها على أساس إنها تأكد اللي بيحكيه يعني، طبعا هى ماردتش عشان مش سامعة.. نده تاني بصوت أعلى.. ماردتش.. بدأ أصحابه يتريقوا عليه وإنه أكيد كان بيألف عليهم، من غيظه، وظنه إنها مطنشة راح رامي كوباية النسكافيه السخن عليها من ضهرها!.. تصرف متخلف اتنفضت بعده "ديبورا" وصرخت من الوجع وبصت وراها.. شخط فيها: لما لا تردي يا غبية؟.. ضحك، والباقيين كلهم ضحكوا وراه.. أنا غبية!.. انفصلوا.. "تيد" شاف حياته ونفسه ومافرقش معاه الحدوتة كلها.. "ديبورا" اتأثرت والموضوع أكل شوية مش قليلين من نفسيتها وروحها المعنوية لأنها كانت بتحبه حب حقيقي.

البنت فضلت مسهمة وعينيها زايغة لمدة شهور وتحت تأثير صدمة الانفصال زي أى حد كان بيحب بإخلاص.. زميلها في الكلية "ماك" شاب طيب وعلاقته بـ "ديبورا" علاقة عادية ماكنتش قوية أوي بس كان فيه بينهم مساحة الود الطبيعية بين أي اتنين في صف دراسي واحد بقالهم كذا سنة.. على قد ما يقدر وبعد ما الموضوع بتاعها هي و"تيد" انتشر حاول "ماك" يخليها تصرف نظر عن الكلام في الموضوع ده وخلاص اللي حصل حصل وصفحة واتقفلت.. "ديبورا" أبدًا.. أنا جوايا طاقة غضب ولازم أفرغها ومفيش قدامي غير العرض المسرحي!.. طيب وماله العرض بالانتقام!.. الفكرة إن العرض المسرحي اللي كانوا هيعملوه عبارة عن إن كل أفراد الفريق المسرحي هيطلعوا على المسرح وكل واحد فيهم هيقول "The Day When We Met" وبعد كده يرص كام جملة عن أهم علاقة كانت في حياته.. أغلب الناس كانوا هيقولوا كلام إيجابي بس "ديبورا" قررت إن لأ.. أنا اتأذيت من "تيد" وهحكي كل الزفت اللي شفته منه وإزاي إني من يوم ما قابلته ماشوفتش يوم حلو وعشان أخلّي الناس تتعلم محدش يفرط في حق نفسه.

"ماك" حاول يقنعها إن ملوش لزمة وإن ده هيضر صحتها وإن "تيد" مايستحقش إنه يشغل مساحة من تفكيرها أكتر من كده.. برضه هي صممت إن لأ.. يا بنتى يهديكي يرضيكي.. أبدًا.. طيب خلاص اعملي اللي عايزاه بس بلاش الإرهاق والإهمال في صحتك اللي إنتى فيه ده.. لأ برضه.. عرف "ماك" إن مفيش فايدة من الكلام معاها وإنها هتعمل اللي عايزاه.. مرت الأيام وبقى فاضل على العرض المسرحى أسبوع واحد بس.. "ماك" كان شايف إن مهمة إخراج "ديبورا" من الحالة اللي هي فيها لازم تحتل أولوية عنده.. إزاى؟.. سلسلة من المفاجآت المتتالية ورا بعض اللي مجرد ما البنت تفوق من واحدة تلاقى التانية في وشها.. المهلة؟.. الأسبوع اللي فاضل.. المهمة؟.. "ديبورا" شافت كتير ولازم تنبسط.. تكلفة ده هتكون قد إيه؟.. تقريبًا مفيش تكلفة غير شوية تفكير وتعب في حاجات بسيطة وصغيرة لمدة أسبوع مش هياخدوا منه مجهود أساسًا بس تأثيرهم هيبقى معلم في دماغها.. لحظة؛ هو كان بيحبها؟.. محدش عارف.. طب هيعمل ده ليه؟.. عشان ماعندوش بُخل في مشاعره وعشان في إيده إنه يعمله وعشان عارف تأثير ده على أي حد، وكمان عشان جرب قبل كده شعور إنك تكون أسير رواسب علاقة انتهت وفاهم إن تكملة "ديبورا" في السكة دي هتبقى آخرها فين ومش عايزها تكرره.. بعدين معايير الصداقة عندهم بره مختلفة عننا هنا ومش لازم عشان يبسط اللي قدامه يكون بيحبه حب عاطفي.. حلو يالا نبدأ.. هو عارف خط سيرها يوميًا بالتفصيل الممل من البيت للجامعة للمسرح للمطعم للبيت تاني.. "ديبورا" عشان توصل للجامعة كل يوم كانت بتعدي بالعربية بتاعتها على بوابة فيها رسوم بتتدفع.. "ماك" كان يسبقها بعربيته ويدفع لها الرسوم ويتفق مع موظف البوابة إن يقول لها إن فيه حد دفع لها هى وأول 5 هيعدوا بعده!.. كل يوم؟.. كل يوم.. وهو مبلغ تذكرة المرور ده أصلًا تافه وصغير بس فكرة إنك تلاقي حد بيهاديك حاجة بشكل يومي لمدة أسبوع وأنت ماتعرفهوش بتحرك جواك مشاعر انبساط ملموسة.. "ديبورا" بتحب تقرأ "ميكى".

"ماك" يجيب كارتونة من مجلات ميكي أعداد قديمة وجديدة ويخطط لمسابقة هبلة كده في الكلية عندهم ويخلّي كل أسئلة المسابقة مايقدرش يجاوب عليها غير "ديبورا".. يحط أسئلة مثلًا زي عنوان أشهر محل بيتزا في المنطقة اللي هي ساكنة فيها!.. عدد اللترات بتاعت البنزين اللي بيحتاجها التانك بتاع ماركة العربية كذا -(اللي هى بالصدفة كانت بتكون عربية "ديبورا" بالتالي محدش هيعرف يجاوب غيرها)-.. يلعبوا كوتشينة وفيه أحكام على اللي هيخسر فيتفق "ماك" مع أصحابهم وهما بيلعبوا إنه هو اللى يخسر وإن هى اللي تكسب.. في أحكام لعبة الكوتشينة عندهم الشخص اللي بيخسر هو اللي بيختار الحكم اللي يتنفذ فيه فيختار هو إنه يزوق لها العربية بتاعتها!.. تخرج من الكلية تلاقى العربية بتاعتها متزوقة بـ ورد بشكل لطيف وحلو كإنها عربية زفة!.. يعرف إن عيد ميلاد والدتها هيكون بعد يومين وطبعًا "ديبورا" ناسية؛ فيقرر "ماك" إنه يديها تورتة عليها اسم والدتها عشان تروح بيها وتحتفل معاها بدل ما تدخل عليها بإيديها فاضية، ولما تسأله عملت كده ليه يقول لها إن اسم والدته زي اسم والدتها وإنها سافرت فجأة ومش هيعمل حاجة بالتورتة دي فخديها إنتي أحسن.. من هنا ومن هناك يكون المجموع الإجمالي بتاع شوية الحركات دي 15 حركة حلوة في أسبوع.. يتغير المود بتاع "ديبورا" تدريجًيا والحقيقة إن "ماك" ماكنش بيعمل ده بإسفاف ولا سماجة ولا كان بيتعمد يظهر في كل الحاجات بس هو كان بيلعبها صح.. بس برضه ولأن البنات مفيش حاجة بتخفى عليهم وبيكونوا حاسين بأي مشاعر؛ أكيد ده وصل لـ "ديبورا" بشكل أو بآخر.. جه يوم العرض المسرحي.. وهي واقفة فوق المسرح كانت بتدور وسط الوشوش اللي قاعدين بيتفرجوا عن عين شخص واحد بس كان يستحق إنها تركز معاه.. "ماك".. ومجرد ما عيونهم جت في بعض ابتسمت ووجهت كلامها ليه هو وقالت: "The Day When We Met ".. يوم أن قابلتك؛ تغير كل شىء.. وماجبتش سيرة "تيد" بأى حرف.. ده اللي هي قالته بس اللي كانت تقصده "يوم أن قابلتك.. تعافيت".

 التعافي مش صدفة، ولا ضربة حظ، ولا معجزة بتنزل من السما فجأة، التعافي قرار إنك ما تبقاش أسير لحظة، ولا رهينة جرح، ولا سجين لذكرى.. للأسف أكتر حاجة بتكسر الإنسان مش اللي اتعمل فيه، لكن إصراره إنه يعيش جوه اللي اتعمل فيه!.. فيه ناس بتختار تبقى شاهد على وجعها طول العمر.

وفيه ناس بتختار تبقى أكبر منه.. عشان كده الدنيا ببساطة امتحان يا إما هتطلع منه أنضج، يا إما هتطلع منه أغلظ.. التعافي مش محتاج منك غير شوية إرادة وقناعة إنك تستحق الأفضل حتى لو كان فيه شوية وجع في رحلة التعافي.. الكاتب "أحمد العمري" قال: ربما الشفاء أحيانا يكون جزء من الألم، لا يمكن لأحد أن يطلب الشفاء ويتذمر من الألم الذي يصاحب الالتئام.