ضربته بالقلم علشان أحتوي الموقف.. ننشر أقوال عمدة ميت عاصم في واقعة إجبار شاب على ارتداء ملابس نسائية ببنها
يستكمل القاهرة 24، نشر التحقيقات في واقعة إجبار شاب بقرية ميت عاصم التابعة لمركز بنها بمحافظة القليوبية على ارتداء ملابس نسائية في القضية المعروفة إعلاميًا بـ بدلة الرقص.
وحصل القاهرة 24 على أقوال عمدة قرية ميت عاصم، وجاءت أقواله بسؤاله: ما طبيعة عملك واختصاصك الوظيفي؟
ج: أنا عمدة قرية ميت عاصم مركز بنها قليوبية.
س: منذ متى وأنت تباشر ذلك الاختصاص؟
ج: منذ عام 2009 وحتى الآن.
س: ما معلوماتك بشأن الواقعة محل التحقيق؟
ج: اللي حصل إن أنا عرفت من ناس في البلد إن رحمة السيد فكري متغيبة عن المنزل من يوم الثلاثاء اللي فات، ويوم الخميس اللي فات الموافق 2026/2/12 حوالي الساعة 11 صباحًا كنت في قعدة بالبلد عندنا بحل مشكلة، فجالي تليفون وأبلغني بوجود مشكلة إن في ناس ملبسه واحد بدلة رقص وبيلفوا بيه البلد، فقمت رحت على طول هناك، لقيت إسلام محمد أحمد لابس بدلة رقص وحواليه ناس كتير، فروحت هناك عشان أحتوي الموضوع، ضربته قلم بسيط على وشه، وسألت اللي حواليه فين هدومه، قالولي عند بيت السيد فكري.
رحت معاهم عشان أحتوي الموقف وأخلصه من أيديهم لأني عرفت إن هم كانوا فاكرين إنه خطف بنتهم، وبعد كده أخدتهم ورحنا على بيت المتهمين، وبعد كده قلت لهم هاتوا اللبس بتاعه ولو ليكوا حق أجيبهولكم، وليست إسلام، ومعاون المباحث جه خدهم وطلع بيهم على المركز، وهو ده كل اللي حصل، وأنا ضربت إسلام محمد أحمد عشان أحتوي الموقف علشان ما يعملوش فيه حاجة، وده كل اللي حصل.
س: متى وأين حدث ذلك؟
ج: الكلام ده حصل يوم الخميس اللي فات 2026/2/12 بقرية ميت عاصم مركز بنها حوالي الساعة 11 صباحًا.
س: ما مناسبة تواجدك بالزمان والمكان سالفي الذكر؟
ج: أنا رحت المكان ده عشان جالي تليفون إن في واحد لابس بدلة رقص في الشارع والناس ملمومة حواليه.
س: من كان برفقتك آنذاك؟
ج: أنا كنت حاضر في مشكلة بالبلد، ولما جالي التليفون كنت لوحدي.
س: وما الذي أبلغت به تحديدًا؟
ج: هو التليفون اللي جالي قال لي إن في واحد لابس بدلة رقص وواقف في الشارع وحواليه ناس كتير.
س: ما التصرف الذي بدر منك عقب ذلك؟
ج: أنا بمجرد ما عرفت على طول طلعت على المكان.
س: وما الذي استرعى انتباهك حول الواقعة؟
ج: أنا أول لما وصلت مكان الواقعة لقيت إسلام محمد أحمد لابس بدلة رقص وحواليه ناس كتير من أهالي البلد في الشارع.
س: وما التصرف الذي بدر منك حيال ذلك؟
ج: أنا عشان أحتوي المنظر اللي شايفه قمت ضارب إسلام محمد أحمد بالقلم على وشه، وقمت واخده على بيت المتهمين اللي كانوا عاملين فيه كده، وطلبت منهم يلبسوه الهدوم بتاعته ويقلعوه بدلة الرقص اللي كان لابسها إسلام.
س: من القائم على تلبيس المتهم بدلة الرقص الذي أبصرته عليه؟
ج: أنا ما شفتش مين اللي لبسه بالظبط، لأني لما رحت لقيته لابس البدلة في أول البلد، وكانوا عاوزين يلفوا بيه في البلد.
