الدماطي: عدم رضاك عن الإدارة ليس مبررا لغياب الجماهير في المباريات.. وهل الدوري مش مهم
تحدث محمد الدماطي عضو مجلس إدارة النادي الأهلي عن ضعف عدد الحضور الجماهيري خلال مباريات الفريق الأحمر ضمن منافسات مسابقة الدوري الممتاز للموسم الحالي.
وقال محمد الدماطي عبر حسابه الشخصي على موقع التواصل الاجتماعي فيس بوك: هتكلم في البوست دة بصفتي مشجع أهلاوي قبل ما ابقى عضو مجلس إدارة، وعارف حجم الأبواب اللي حتتفتح عليا، بس أنا مش بعرف استخبى.
وتابع في تصريحاته: مهما كان درجة عدم رضاك عن الإدارة أو الفريق أو أي شيء دة مش مبرر أبدا لضعف الحضور الجماهيري في مباريات حاسمة في الدوري، لو هي ظاهرة عامة ممكن أقول فقدان شغف، أو مشاكل مع الجمهور، لكن لما يبقي الحضور كامل العدد في ماتشات إفريقيا وعدد قليل جدًا في مباريات الدوري يبقي إيه السبب.
وواصل في تصريحاته: هل بنوصل رسالة للاعبين أن الدوري مش مهم، مفيش أي مبرر منطقي للتفاوت دة، ومش حندفن رأسنا في الرمل ونعمل مش واخدين بالنا، كل البطولات مهمة، والتواجد الجماهيري دة لوحدة بيحسن الأداء، أنا على مدار عمري كنت أكتر فترة لازم أبقى موجود فيها في المدرج والفريق محتاجني عشان يكسب.
واستكمل الدماطي حديثه: نقفل على نفسنا شهرين بس، نركز مع حاجة واحدة اننا نزق فرقتنا لقدام لحد آخر الموسم، نشجع ونروح الاستاد، ونسيب أي انتقادات علي جنب دلوقتي عشان مش مهم الأشخاص، محدش حيفتكر حاجة غير البطولات في الاخر، المهم الأهلي، الأهلي وبس.
واختتم عضو مجلس إدارة القلعة الحمراء حديثه قائلا: يا ريت الناس المؤثرة تتبني الاتجاه دة، كل حاجة لسة في إيدينا، وإن شاء الله ربنا حيكرمنا في الآخر.
ويرتبط الأهلي بمباراة حاسمة تجمعه مساء غدًا السبت، على ملعب استاد القاهرة الدولي، أمام نظيره زد ضمن منافسات الجولة العشرين من مسابقة الدوري الممتاز للموسم الحالي.
