طريقة عمل بسكويت النشادر.. غلطة في أول خطوة تفسد العجينة كلها
طريقة عمل بسكويت النشادر، هي أكثر طرق اعداد بسكوت العيد أو بسكويت العيد، إذ يتميز برائحته القوية والطعم المميز والقوام الناعم الذي يذوب في الفم، ولا يحتاج لإتقانه سوى بعض النصائح. ويكثر البحث عن طريقة عمل بسكويت النشادر خلال الفترة الحالية نظرا لاقتراب عيد الفطر وبدء التجهيز لمخبوزات العيد، كذلك يقدم بسكويت العيد مع الشاي في المسافات والزيارات.
وعبر القاهرة 24 نستعرض طريقة عمل بسكويت النشادر خطوة بخطوة، ونصائح الحصول على القوام المطلوب والنكهة المضبوطة، ووصفة بسكوت العيد الفلاحي أيضا.
طريقة عمل بسكويت النشادر
لم تعد طريقة عمل بسكويت النشادر، تشترط وجود ماكينة خاصة لتشكيل البسكويت، أو مهارة عالية في الخبز، إذ تكفي بعض النصائح لكي تصل ربة المنزل إلى الوصفة الناجحة دون أخطاء، ويقدم الشيف محمد حامد وصفة بسكويت الزبدة بكيس التشكيل المخصص للكريم شانتيه:
مقادير بسكويت النشادر
- كيلو زبدة طرية
- 400 جرام سكر بودر
- 5 بيضات
- كيلو و400 جرام دقيق (يفضل دقيق خاص بالكحك والبسكويت)
- نص معلقة كبيرة بيكنج بودر
- نص معلقة كبيرة نشادر (مذوبة في شوية حليب أو ماء)
- فانيليا برتقال حسب الذوق
لنص الكمية:
- نص كيلو زبدة
- 200 جرام سكر بودر
- 3 بيضات
- 700 جرام دقيق
- معلقة إلا ربع بيكنج بودر
طريقة عمل بسكويت النشادر
- اخفقي الزبدة الطرية مع السكر البودر بالمضرب الكهرباء كويس جدًا لحد ما يبقوا كريمة فاتحة اللون، وده أهم خطوة في نجاح البسكويت.
- الزبدة لازم تكون طرية جدًا وتتخفق لحد ما لونها يبقى فاتح جدًا وكريمي، ده هو سر البسكويت اللي بيدوب في البق.
- نزلي البيض واحدة واحدة على سرعة بطيئة وهي بتخفق، وضيفي الفانيليا.
- مش لازم تختاري واحد منهم، ممكن تجمعيهم مع بعض.
- فكي النشادر في شوية حليب أو ماء وضيفيها على الخليط مع البيكنج بودر.
- النشادر ممنوع تحطيها جافة، لازم تذوبيها في حليب أو ماية وبعدين تضيفيها.
- ضيفي الدقيق وقلبي بإيدك مش في العجان، لأن العجان ممكن يخلي الزبدة تركد تحت والدقيق فوق. الإيد بتجيب كل حاجة مع بعضها صح.
- قصي من طرف الكيس قطعة صغيرة جدًا بالمقص مش بالسكينة، عشان تقدري تستخدمي الكيس أكتر من مرة.
- امسكي الكيس من فوق وانزلي العجينة للنص، ولفي الجزء الفاضي عشان تتحكمي في الكيس كويس.
- امسكيه من نقطة واحدة فوق وضغطي بثبات على الصاج.
- مش شرط تحطي نشادر وبيكنج بودر مع بعض، ممكن تشتغلي بواحد بس.
- لو هتحطي النشادر بس: معلقة كبيرة على الكيلو، لو هتحطي بيكنج بودر بس: معلقة كبيرة على الكيلو.
- لو عايزة بسكويت مكنة ضيفي 200 جرام دقيق زيادة على الكيلو زبدة وحطي العجينة في الثلاجة شوية.
- لبسكويت القرفة: رشي قرفة على وجه البسكويت قبل الفرن.
- لبسكويت الشيكولاتة: قلبي 2 معلقة كبيرة كاكاو مع 2 معلقة زيت وضيفيهم على جزء من العجينة، الزيت بينعم العجينة وبيخلي اللون أحلى.
- اخبزي البسكوت في درجة حرارة الفرن الساخن 190 درجة لـ 12 دقيقة
- طلعيه لما ياخد اللون الدهبي وسيبيه يبرد شوية قبل ما تمسيه عشان يتماسك
- كيلو زبدة بيعمل حوالي 7 صواني بسكويت
طريقة عمل بسكويت النشادر الفلاحي
إما طريقة عمل بسكويت النشادر الفلاحي بماكينة البسكويت التقليدية، فهي وصفة سهلة أيضا ويمكن إعدادها بنجاح مع اتباع نصائح الشيف نجلاء الشرشابي كمقادير وخطوات:
مقادير بسكويت النشادر الفلاحي
- كيلو دقيق
- خمس بيضات
- كوباية ونص سمنة جامدة
- كوبايتين سكر بودرة
- معلقة كبيرة نشادر
- اتنين أو تلاتة معالق لبن بس (قليل جدًا)
- اتنين أو تلاتة باكو فانيليا
- رشة ملح
طريقة عمل بسكويت النشادر الفلاحي
- اضربي السمنة الجامدة مع السكر البودرة كويس قوي لحد ما يبقوا زي الكريمة ويتفتح لونهم ومتكونش سائلة هتفسد العجينة كلها.
- أضيفي البيض بيضة بيضة وأنتِ بتخلطي، وأضيفي الفانيليا واستمري في الخلط لحد ما يبقى الخليط متجانس تمامًا زي خلطة الكيك.
- حلّي النشادر في اتنين أو تلاتة معالق لبن بس، وأضيفيها على الخليط.
- أضيفي الدقيق كله ورشة الملح، وسيبي منه شوية بس عشان ما يبوظيش العجينة، واعجني عجن كويس.
- الدقيق الخاص بالكحك والبسكوت بيدي نتيجة أحسن من الدقيق العادي.
- العجينة لازم تبقى ماسكة نفسها، مش ناعمة أوي، فيها خرفشة — ده هو السر اللي بيطلع معاه البسكوت مخرفش في المكنة.
- سخّني الفرن على 190 درجة
- شغلي المكنة وشكّلي البسكوت على الصاج
- اخبزي من 10 لـ 12 دقيقة لحد ما ياخد اللون الدهبي
