هشام نصر: الزمالك أثبت إن عنده حلول لمشاكله.. ويكفي 3 محترفين لكل فريق
علق هشام نصر نائب رئيس نادي الزمالك، على النتائج الجيدة لفريق الكرة الأول بالنادي خلال الفترة الأخيرة، ونجاحه في الانفراد بصدارة ترتيب مسابقة الدوري الممتاز.
هشام نصر: الزمالك أثبت إن عنده حلول لمشاكله
وقال هشام نصر، في تصريحات مع الإعلامي سيف زاهر: الحمد لله على كل حاجة ده توفيق من ربنا قبل أي حاجة، ودعم الجماهير اللي ملوش حدود، مع إخلاص النية وحالة الحب الكبيرة بين اللاعبين، وده نتيجته إننا قدرنا نتصدر الدوري ونتفوق على أندية كبيرة.
وأضاف: الزمالك بيثبت إنه عنده حلول لمشاكله، والدليل إن 7 لاعبين من قطاع الناشئين أصبحوا عناصر أساسية وبيثبتوا إنهم لاعبين محترمين وعندهم مستقبل قوي جدًا، وكل واحد فيهم عايز يثبت إنه رقم واحد في الملعب، ولما يبقى في تنافس بالشكل ده طبيعي تشوف النتيجة دي.
وأردف هشام نصر: الزمالك لو أخد شوية اهتمام ودعم من كل المسؤولين في مصر، الدوري المصري والرياضة المصرية هتستفاد منه جدًا.
وواصل نائب رئيس الزمالك: رغم الصعوبات التي نمر بها، قطاع الناشئين طلع عناصر كويسة جدًا، ونتمنى كل الأندية تهتم بقطاعها بدل ما تصرف ملايين وتستنى لاعبين جاهزين، الضائقة المالية خلتنا نتجه للناشئين أكتر، وطلعوا قد المسؤولية وأثبتوا نفسهم بشكل يحترم.
وأكمل هشام نصر حديثه: أنا كنت اتكلمت قبل كده عن فكرة وجود 5 محترفين، لأن العدد ده ممكن يقعد لاعبين مصريين كتير على الدكة، أنا مش ضد المحترفين، لكن شايف إن 2 أو 3 كفاية علشان تدي فرصة لأولادك، لأن لو عايز توصل للعالمية لازم تبني على ولاد النادي، أنا خريج اتحادات وعندي وجهة نظر دايمًا مبنية على خبرة وتجربة.
