مي القاضي: لو الفن حرام مش هسيبه.. أنا مبعملش حاجة غلط
علقت الفنانة مي القاضي على حرمانية الفن، مؤكدة أنها لن تتركه مهما حدث لأنها تحب مهنتها، وتنوي تقديم الكثير من الأدوار المختلفة فيها.
وقالت مي القاضي خلال لقاء تليفزيوني: معرفش الفن حرام ولا حلال، نفسي يكون الفن حلال، أوقات بقول يا ترى حلال ولا حرام، فـ ليه يبقى حرام؟، أنا بحبه ومش شايفة إنه حاجة غلط، ولا اللي شغالين فيه غلط، شغلانة متعبة وفيها قيود، وربنا مقالش الفن حلال ولا حرام مفكرتش أعتزل وارتدي الحجاب.
وأضافت: بشوف اللي عملوا كده خطوة كويسة، وعايزين يقربوا من ربنا بعد مشوار، وأنا لسه في حاجات كتير نفسي أعملها لسة مشبعتش من التمثيل.
تصريحات مي القاضي عن اعتزال الفن
وأردفت مي القاضي: لو الفن حرام مش هسيبه عشان أنا بحبه، لازم أكون مقتنعة ومافيش حاجة غلط بعملها، أو اقتنع بكلام اللي بيتكلم، شايفة إن الدنيا أبسط من كده بكتير، الدين عايزنا منكدبش ولا نسرق، وفيه ناس قافلين على نفسهم مبيخرجوش ولا بيسمعوا أغاني، مبحبش أبقى كده مبحبش التطرف.
وفي سياق آخر، علقت مي القاضي على فكرة تجميد بويضاتها لحين الزواج مثل الفنانة ناهد السباعي، قائلة: برافو أنها عملت كده، مع والعلم دايما بيطلع حاجات جديدة في العلم تسهل علينا حياتنا، وبفكر أعمل تجميد بويضات لأن ده هيدي فرصة للست تعمل أي حاجة في الوقت اللي عايزاه.
