هشام نصر: زيزو كسب فلوس وخسر التاريخ.. وجوهر نبيل وعدنا بدراسة أزمة أرض أكتوبر
قال هشام نصر، نائب رئيس نادي الزمالك، إنه يشعر بالحزن من أحمد مصطفى زيزو، نجم النادي الأهلي، بعد رحيله عن القلعة البيضاء في بداية الموسم الحالي.
تصريحات هشام نصر
وقال هشام نصر في تصريحات إذاعية: مليش دعوة بزيزو، ومش شايفه أصلا ومش هقيم مستواه مع الأهلي، أنا زعلان عليه لأنه هيكسب فلوس سنتين مثلا، ولكنه خسر تاريخه في الزمالك لأنه كان أسطورة.
وأضاف نائب رئيس نادي الزمالك: زيزو كان طالب أكتر من 60 مليون جنيه للتجديد للزمالك، ومفيش لاعب في مصر يستاهل المبلغ ده، ربنا يسهله هو اختار طريق بعيد عنا، وشيكابالا دلوقتي الناس كلها بتتصور معاه وشايفاه رمز رغم إنه كان عنده أخطاء وهو لاعب، بس هو أعظم من لمس الكورة برجله الشمال، وحب الزمالك واختار يبقى جواه لنهاية العمر مش زي زيزو، واللي عمله على فكرة مش احتراف.
وكشف هشام نصر، أن جون إدوارد لم يطلب من شيكابالا الاعتزال، مثلما تردد، قائلا: مش حقيقي إن جون إدوارد وراء قرار شيكابالا بالاعتزال، سمعت إن الناس قالت إنه قال لازم يعتزل عشان كبر سنه، وده محصلش بدليل إن عبد الله السعيد أكبر من شيكابالا ومكمل عادي، فيما أردف: إحنا قعدنا مع شيكابالا وحصل توافق بينا، وأعلن القرار.
وأوضح هشام نصر، أن جوهر نبيل وزير الشباب والرياضة وعد المجلس بدراسة ملف أزمة أرض أكتوبر، قائلا: اجتمعنا مع جوهر نبيل واطلعناه على تفاصيل أزمة أرض أكتوبر ووعدنا بدراستها، وقال لنا هرجع ليكم بالخبر اليقين ونتمنى له التوفيق والسداد في خطواته المقبلة.
وأكمل هشام نصر: أيمن ممدوح عباس ضمن المرشحين لتولي رئاسة شركة الكرة بالزمالك، نبحث ضمن المرشحين عن الفكر الإداري الرياضي بجانب القوة المادية، وقناة الزمالك تحسنت كثيرا برؤية هاني شاكر ووجود ماهر غريب والوجوه الشابة التي دفعنا بها.
واختتم هشام نصر: حسين لبيب أخويا، وأحمد سليمان واخد جنب مننا ومع ذلك بيحضر كل الجلسات ويشارك في كل شيء يخص النادي، ورئاسة الزمالك شرف كبير، ورسالتي للجمهور: كملوا زي ما أنتم في دعم النادي.
