كزبرة: أنا جاي من حتة صعبة ومش حابب أعيشها تاني.. وشباب كتير تايهين بسبب تأثير المجتمع
تحدث الفنان أحمد بحر، الشهير بـ كزبرة، عن الرسالة التي يناقشها مسلسل بيبو، المعروض حاليًا ضمن الماراثون الرمضاني، مؤكدًا أن العمل يسلّط الضوء على حالة التشتت التي يعيشها بعض الشباب في تحديد أهدافهم وطموحاتهم.
وقال أحمد بحر كزبرة في لقائه مع القاهرة 24، إن كثيرًا من الشباب لا يعرفون ما الذي يريدونه في الحياة، موضحًا: بنلاقي شباب كتير يقولك هفتح بلايستيشن شوية، وبعدها يقولك لأ هفتح مطعم.. طب أنت عايز إيه؟ وليه تايه؟ وده بييجي من تأثير المجتمع ومن وهو صغير مش عارف هو عايز إيه بالظبط.
وأضاف أن شخصية بيبو، الموجودة في المسلسل تشبه نماذج حقيقية قابلها في حياته، موضحًا: بشوف بيبو في صحابي من الطفولة، تلاقيه قاعد على السلم، ولما تقوله روح اشتغل تحس عنده كبرياء، ويقولك لو اشتغلت هاخد 8 أو 10 آلاف، هدفعهم مواصلات وأكل وشرب.
مسلسل بيبو
وأكد أن المشكلة الحقيقية تكمن في الخوف من البداية أو رفض العمل بسبب ضعف الأجر، مشيرًا إلى أن الإنسان يجب أن يتحرك ويجتهد حتى لو كانت البداية بسيطة، قائلًا: قوم واشتغل ومتقولش الأجر قليل، لأن ربنا ممكن يفتحلك باب أكبر، بس لازم تتحرك الأول وتستحمل لأن الحياة صعبة.
وتابع أن الشخص الذي يعرف هدفه يسير بثبات دون الالتفات إلى الخلف، مضيفًا: أنا عارف أنا عايز إيه ومكمل، وببص لربنا ومش ببص ورايا، الإنسان اللي طالع من ظروف صعبة عمره ما يحب يرجع يعيشها تاني.
واختتم كزبرة حديثه بالتأكيد على أن الفرص قد لا تتكرر كثيرًا لمن يأتون من ظروف صعبة، لذلك يجب استغلالها، موضحًا: اللي زينا حياتهم مفيهاش فرص كتير، وربنا بيدينا فرصة لازم نستغلها، أنا جاي من حتة صعبة ومش حابب أعيشها تاني، أهالينا بيعملوا اللي عليهم ويمكن يبيعوا من نفسهم علشان يعيّشونا، بس في الآخر القرار لازم يكون قرارك أنت.
