الأم المثالية من ذوي الهمم على مستوى الجمهورية: ما استسلمتش.. كنت أم وأب في نفس الوقت

روت سوسن عبد الرحمن إسماعيل، الأم المثالية على مستوى الجمهورية لفئة ذوي الهمم، تفاصيل رحلتها التي وصفتها بأنها "اختبار من الله تحول إلى رسالة حياة". 

وقالت سوسن عبد الرحمن إسماعيل في تصريحاتها لـ القاهرة 24، إن الصبر والإيمان كانا سلاحها الأول في مواجهة التحديات، وتزوجت عام 1986، ورُزقت بابنتها الأولى عام 1989، لكنها وُلدت كفيفة البصر، مضيفة: "كانت صدمة كبيرة، لكني قلت الحمد لله، وبدأت أفكر إزاي أتعامل مع الوضع:،

وأوضحت أن التحدي تضاعف بعد إنجابها لابنيها عامي 1994 و1997 بنفس الإعاقة، لتجد نفسها أمام مسؤولية تربية 3 أبناء من ذوي الهمم.

وأضافت: زوجي كان مسافر أغلب الوقت بسبب شغله، فكنت أنا المسؤولة عن كل حاجة.. كنت أم وأب في نفس الوقت، وكنت عارفة إن الشفقة مش هتنفع، لازم أربيهم يعتمدوا على نفسهم، مشيرة إلى أنها قررت تطوير نفسها لتكون قادرة على دعم أبنائها، وفي 1997 تقدمت على بعثة خاصة بالمكفوفين.

ولفتت إلى أنها اعتمدت في تربيتها على الحزم الممزوج بالحب، قائلة: "مفرقتش بين حد فيهم، ومدلعتهمش زيادة، كنت دايمًا بقولهم إنهم زي أي حد، ولازم ينجحوا ويتفوقوا".

وتابعت: "بنتي الكبيرة جابت مراكز أولى على مستوى الجمهورية، واتخرجت في كلية الآداب، واشتغلت في شركة بترول، وابني التاني دخل نظم ومعلومات واتخرج بتقدير كويس جدًا، وابني الصغير اتخرج من إعلام امتياز مع مرتبة الشرف، واشتغل على نفسه لحد ما بقى عنده بودكاست وظهر في برنامج العباقرة قادرون باختلاف، وكمان قدم احتفالية قادرون باختلاف قدام رئيس الوزراء".

وأكدت أن رسالتها لم تتوقف عند أبنائها فقط، قائلة: "اشتغلت معلمة وموجهة للإعاقة البصرية، وفضلت أساعد الطلبة حتى بعد المعاش، لأن دي رسالة مش شغل وبس".

واختتمت حديثها قائلة: "كمان ربيت أولاد إخواتي بعد وفاتهم، لأنهم أمانة.. أنا مؤمنة إن ربنا لما بيحطك في اختبار، بيديك القوة تعدي، وأنا ما استسلمتش.. وكنت شايفة دايمًا إن النجاح هو الطريق الوحيد".