شقيق متهم في واقعة إلقاء أكياس المياه على المصلين بالنزهة: تجاهلوا كلامنا معهم.. وركبوا فوق السيارة
روى يسري خطاب، شقيق أحد المتهمين في واقعة إلقاء أكياس مياه على المواطنين عقب صلاة عيد الفطر بمنطقة النزهة بالقاهرة، تفاصيل جديدة حول الواقعة، مؤكدًا أن ما حدث جاء كرد فعل على تصرفات بعض الموجودين حول السيارة.
تفاصيل جديدة في واقعة إلقاء أكياس المياه على المصلين بالنزهة بعد صلاة عيد الفطر
وقال يسري في فيديو عبر صفحته الشخصية بموقع إنستجرام: إحنا بقالنا 6 سنين بنعمل نفس الحاجة، وبنوزع فلوس كل عيد، لكن السنة دي الناس ركبت فوق العربية، وكنا بنرمي المية على العربية علشان الناس تبعد بعد ما كلمناهم بهدوء.
وأضاف في واقعة إلقاء أكياس مياه على المواطنين عقب صلاة عيد الفطر بمنطقة النزهة بالقاهرة: الناس استنتنا، وخدنا بالنا إن السنة اللي فاتت برضه كانوا واقفين فوق العربية، والكبوت باظ واتصرف عليه فلوس كتير، واستعوضنا ربنا.. وإحنا دايمًا لما بنحط البالونات بنحط فلوس في الأكياس.
وأكمل: المرة دي لما شفنا الناس راكبة على الكبوت، نزلنا وكلمناهم بالذوق وطلبنا منهم يبعدوا، لكن لما طلعنا تاني اتفاجئنا إنهم رجعوا ركبوا مرة تانية، فاضطرينا نرمي الأكياس على العربية.
وأشار إلى أن الأمور تطورت، قائلًا: بعض الشباب بدأ يعمل حركات غير أخلاقية، وإخواتي البنات بدأوا يرموا أكياس علشان كانوا بيتعرضوا لتحرش لفظي.
وأوضح يسري، أن الفيديو المتداول الذي يظهر شقيقه خلال إلقاء الأكياس “كان رد فعل”، مضيفًا: “فيه كيس طفل رماه على سيدة وسقط فوق دماغها، وأنا بعتذر لها.
واختتم حديثه قائلًا: فيه ناس كمان بتطالب بالقبض على البنات اللي كانوا بيدافعوا عن نفسهم، واتهمونا باتهامات غير أخلاقية، وأنا مش هسامح أي حد قال كلام كدب علينا.
