أقوال المجني عليه في واقعة ارتداء ملابس نسائية بميت عاصم: العمده ضربني بالقلم عشان يفض الحوار
يستكمل القاهرة 24، نشر التحقيقات في واقعة إجبار شاب بقرية ميت عاصم التابعة لمركز بنها بمحافظة القليوبية على ارتداء ملابس نسائية في القضية المعروفة إعلاميا بـ بدلة الرقص.
أقوال المجني عليه في واقعة إجباره على ارتداء ملابس نسائية بميت عاصم
س: ما هي الأفعال التي قام بها المتهمون حال اصطحابك للمنزل محل الواقعة؟
ج: هم كلهم كانوا بيضربوني، ولما راحوا البيت قلعوني هدومي غصب عني، وجابوا قميص نوم -بدلة رقص- ولبسوهولي وصوروني ونزلوني الشارع وأنا لابسها.
س: وهل قام أي من سالفي الذكر بتصويرك؟
ج: أيوه، أخوهم صورني وكان بيقولي إني أقول إن أخويا هو اللي عمل كده.
س: وما هي طبيعة ذلك المقطع المصور؟
ج: هم صوروني وأنا قاعد في البيت عندهم ولابس بدلة الرقص، وصوروني وأنا بقول إن أخويا اللي عمل فيا كده علشان أنفي التهمة عنهم، وأقول إن أخويا هو اللي خلاني أعمل كده، وأنا قلت كده علشان كنت خايف منهم، وصوروني وأخويا بيضربني.
س: وهل قام أي من المتهمين بنشر ذلك المقطع على إحدى مواقع التواصل الاجتماعي؟
ج: معرفش.
س: وهل كان بحوزة أي من المتهمين ثمة أسلحة أو أدوات؟
ج: أيوه، أخوها كان معاه سنجة.
س: وهل استخدم المتهم ذلك السلاح في التعدي عليك؟
ج: أيوه، كان بيضربني بالسلاح على جسمي.
س: وكم عدد الضربات التي كالها لك المتهمون تحديدًا وأين استقرت؟
ج: هم ضربوني كتير في جسمي كله.
س: وما هي الإصابات التي تخلفت لديك جراء ذلك التعدي؟
ج: أنا مصاب تحت عينيّ الاثنين، وفي كتفي، وفي جسمي كله.
س: ومن تحديدًا محدث تلك الإصابات وبأي شيء أحدثها؟
ج: هم كلهم ضربوني، إخواتها الاتنين، وأخوالها الاتنين، وأمها وأبوها.
س: وما هي المسافة التي كانت تفصل بينك وبين المتهمين حال التعدي عليك؟
ج: هم كانوا قريبين مني وحواليّ، وكانوا كلهم بيضربوني.
س: هل من اتفاق سابق من المتهمين على التعدي عليك؟
ج: أيوه.
س: وكيف استبان ذلك لك؟
ج: علشان هم كانوا جايين مع بعض وعارفين هيعملوا إيه، وكانوا مجهزين بدلة الرقص.
س: وما هي حالة الضوء والرؤية بمكان الواقعة؟
ج: الرؤية كانت واضحة لأننا كنا بالنهار.
س: ما هي المسافة بين المنزل الخاص بك وبين المنزل الخاص بالمتهمين؟
ج: حوالي عشر دقائق بالعربية، لأن بيتي في آخر البلد وبيتهم في أول البلد.
س: ما هي المسافة التي قام المتهمون بإجبارك على السير فيها في الشارع ببدلة الرقص؟
ج: هم مشوني حوالي نصف ساعة في البلد ببدلة الرقص من بيتهم لحد حوالي خمسمائة متر، ورجعوني تاني بعد ما العمدة جه وضربني بالقلم علشان يفض الحوار.
