فسحة العيد تحولت لمأتم.. والدة تيا صغيرة الدقهلية ضحية السقوط من المركب: مكنتش أعرف إن دي الصورة الأخيرة
تداول رواد مواقع التواصل الاجتماعي خلال الساعات الماضية، منشورًا مؤثرًا لوالدة الطفلة تيا، التي لقيت مصرعها بعد سقوطها من مركب في نهر النيل.
"مكنتش أعرف إن دي آخر صورة لينا مع بعض يا حبيبتي".. بهذه الكلمات الموجعة بدأت والدة الطفلة “تيا” حكايتها، بعد الحادث المأساوي الذي أنهى حياة ابنتها في لحظات، بعدما سقطت في مياه النيل خلال فسحة مع أسرتها في إجازة العيد.
وقالت: إن تيا بعد ما اتصورت معاها، راحت قعدت ولما نادت على أخوها يتصور زيها، قامت فجأة وقفت على الكرسي من غير سبب، وفي ثواني اختل توازنها ووقعت في المياه.
وأضافت: كل حاجة حصلت بسرعة، وسواق المركب نزل وراها، لكن المركب فضلت ماشية، لحد ما البنتين اللي شغالين فيها استوعبوا ووقفوها، حاولوا ينقذوها، لكنها كانت أسرع من كل المحاولات، موضحة أنها حاولت تنقذ ابنتها بنفسها، خدت طوق ولبسته ونزلت المياه، لكن كانت هتغرق ومقدرتش توصلها.
والله يا تيا انتي كنتي أحلى حاجة في عمري.. كنت لما برجع من الشغل بجري علشان آخدك في حضني وأنام.. ضحكتك كانت عندي بالدنيا.. كلمات الأم كانت مليئة بالحب والكسرة، وهي تصف ابنتها أنها كانت شقية وذكية وجميلة وحنينة، وقلبها طيب، وختمت بكلمات أبكت كل اللي قراها: أنا كمان عايزاكي يا تيا.. ادعولي تزورني في المنام.
