مجتش جنبها وهم اللي ضربوني.. أول تعليق من صاحب واقعة التحرش داخل موقف هايبر وان
تداول رواد مواقع التواصل الاجتماعي، مقطع فيديو لتعدي فتاتين وشاب، بالضرب واستخدام ألفاظ خارجة وإيحاءات غير لائقة، على شاب آخر بموقف هايبر وان، حيث اتهمت الفتاتان الشاب بالتحرش بهما، إلا أن عددا كبيرا من المواطنين الذين كانوا موجودين في الموقف أكدوا حسب ما ظهر في الفيديو المتداول، أن الشاب لم يقترب منهما ولم يرتكب أي فعل تجاههما.
مجتش جنبها.. أول تعليق من صاحب واقعة التحرش بهايبر وان
وروى الشاب، في تصريحات خاصة لـ القاهرة 24، تفاصيل التعدي عليه بالضرب، حيث قال: أنا كنت واقف في دوري بطابور الموقف في أمان الله ولا عملت أي حاجة، العربية وصلت وكنت بركب زي باقي الناس، وأنا بركب لقيت واحدة ست دخلت زسط زحمة الرجالة وقالت ان أنا اتهجمت عليها، وأنا أصلا مكنتش مركز معاها وكنت بركب العربية وفي إيدي شنط، وأنا بركب لقيت اللي بيشدني من ضهري، وكنت واقف في دوري.
وتابع الشاب صاحب واقعة التحرش بهايبر وان: اتبلت عليا والراجل اللي معاها شدني، أنا لا كنت بيا ولا عليا وكنت راجع من الشغل ومطبق ومش مستوعب اللي حصل معايا، أنا لا اتحرشت بها ولا جيت جنبها، وبدأت تغلط فيا هي والراجل اللي معاها، واتهجموا عليا بالضرب، وحصلتلي إصابات، البت رفعت عليا الشبشب، والناس اللي واقفة في الموقف شاهدة على اللي حصل وكذا حد قال إني معملتش حاجة والناس كلها دافعت عني.
