ابنة ضحية زوجها بكرداسة في التحقيقات: بابا حبسنا وسمعت أمي بتصرخ | خاص
كشفت التحقيقات في واقعة مقتل سيدة على يد زوجها بكرداسة إثر تعرضها للضرب والاعتداء على خلفية رفض الأولى ممارسة العلاقة الحميمية معه كونه متعاطيًا للمخدرات، تفاصيل أقوال ابنة المجني عليها فيما يتعلق باللحظات الأخيرة قبل وقوع الجريمة وهرب والدها.
مقتل سيدة على يد زوجها في كرداسة
وكشفت التحقيقات في القضية أنه بمثول ابنة المجني عليه أمام جهات التحقيقات المختصة، وبسؤالها حول ما معلوماتها بشأن الواقعة محل التحقيق؟ أجابت: اللي حصل إن يوم الأربعاء اللي فات أنا نزلت أجيب فطار ورجعت وحضرته أنا وإخواتي وقعدنا كلنا وبعدين لقيت أبويا بيقولي أخد إخواتى وأخش الأوضة عشان عايز يقعد يتكلم مع أمي شوية ولما دخلنا الأوضة كان قافل البلكونة بأفيز وبعد كده قفل علينا باب الأوضة بالمفتاح وفضلنا قاعدين أنا وإخواتي في الأوضة لحد العصر.
وأضافت: سمعت صوت أمي وهي بتقول حرام عليك هتموتني سبني أعيش علشان خاطر عيالي كفاية ضرب فيا، وبعد كده فتح علينا الباب وطلب مني أعمله كوباية شاي وبعد ما عملتها له قعد في الصالة شربها وبعد كده دخلني الأوضة تاني مع إخواتي وقفل عليا لحد الساعة 11 بليل.
وأضافت: وبعد كده فتح علينا ثاني وطلعني أنا وإخواتي وجهزنا الأكل وأكلنا ولما سالته عن أمي قالي إنها تعبانة ومريحة في الأوضة شوية وبعد كده جه واحد صاحبة اسمه علي خده ودخل بيه الأوضة اللي كان حبسنا فيها وقعدوا يشربوا مخدرات وقعدوا حوالي ساعة وبعد كده صاحبه مشي وهو جالنا قالنا نفرش في الصالة ونمنا وهو نام معانا.
واستكملت: أنا معرفتش أنام طول الليل ولما هو نام أنا فضلت أخبط على الأوضة بتاعة أمي عشان أطمن عليها وقعدت أدور على المفاتيح في البيت كله بس ملقتهاش وبعد كده فضلت أعيط لحد الساعة 6 الصبح.
وتابعت: ونزلت أجيب فطار وفطرنا مع بعض وعملتله شاى وقعد جوه في الأوضة وبعد كده نزلني أجيب حاجات ولما رجعت لقيته لامم هدومه وقالي إحنا ننزل أنا واخواتي عند جدتي وهو رايح يشوف عم علي ويجيب كارت شحن وراجع ومن ساعتها مرجعش.
وواصلت: وبعد كده عمي إسلام جه وقالي أساعده إن إحنا ندخل الغسالة وإحنا بنشيلها سمعت صوت شخللة جواها فطلعت المفاتيح جواها ولما جيت أخدها لقيت جدتي بتقولي هاتيها أنا هطلع أبص على أمك بعد ما أنا حكيتلها اللي حصل إمبارح وبعد كده جدتي ومرات عمي طلعوا وبصوا عليها ولما نزلوا وسألتهم في إيه قالولي إن هي بطنها منفوخة وجسمها وارم وتعبانة شوية وبعد كده كلموا جدي سعيد والد أمي وقالوله إنها تعبانة وتعالوا شوفوا بنتكم.
وأردفت: وبعد كده خالي مصطفي جه الأول وبعد كده ودوني أنا وإخواتي عند بيت عمي وده كل اللي حصل.
