الأوقاف عن القبض على الإرهابي علي عبد الونيس: كان يعتقد يومًا أن يد العدالة لن تطوله
علقت وزارة الأوقاف، على القبض على الإخواني علي عبد الونيس، قائلة: الإرهابي كان فاكر في يوم أن يد العدالة مش هتطوله بس أهي طالته.. وهطول غيره بإذن الله.
وقالت في بيان لها: بمناسبة بيان وزارة الداخلية النهاردة عن الإرهابي اللي كان فاكر في يوم إن إيد العدالة مش هتطوله... بس أهي طالته... وهتطول غيره بإذن الله.
الإرهابي كان فاكر في يوم إن إيد العدالة مش هتطوله
وتابعت: هو واللي زيه دخلوا طريق الإرهاب بعد ما شياطين الإنس زينولهم إنهم بكده هيبقوا أبطال وبينصروا الدين.. لكن النهاية دايمًا ندم، مفيش إرهاب نهايته نصر.. نهايته دايما ندم.. الموضوع بيبدأ بكلمة.. بفيديو.. بأغنية حماسية.. بهتاف كلماته قوية.. باستغلال ظروف شخصية واقتصادية وفهم شبه منعدم للدين.. بشخص يقنعك إنك مُختار لمهمة كبيرة، مضيفة: شوية شوية تصدق.. تفكيرك يتغير.. تبعد عن أهلك.. تسمع صوت واحد بس.. صوت اللي بيحركوك.
وأكملت: يقول لك: دي بطولة.. دي تضحية.. دي نصرة للدين، لكن الحقيقة؟ إن دي تضحية بيك إنت..
هم مستخبيين.. وإنت اللي بتتحاسب، هم بيخططوا.. وإنت اللي بتدفع التمن، هم بيكملوا حياتهم.. وإنت بتضيع مستقبلك وآخرتك في لحظة، وساعتها كتير بيقولوا: يا ريتني ما سمعت.. يا ريتني ما صدقت.. يا ريتني ما ضيعت نفسي،لكن الحقيقة المؤلمة: مش كل ندم بيرجع اللي راح.. والدم مش هيرجع في عروق الأبرياء.. والخساير التانية برضه مش هتتعوض.. وانت ميزان سيئاتك بيتقل لحد ما تقع بيه قبل ما تقع في إيد العدالة.
وأردفت: ديننا عمره ما كان دين دم، ولا تخريب، ولا ترويع للآمنين، ربنا سبحانه وتعالى قال: {مَن قَتَلَ نَفۡسَۢا بِغَیۡرِ نَفۡسٍ أَوۡ فَسَادࣲ فِی ٱلۡأَرۡضِ فَكَأَنَّمَا قَتَلَ ٱلنَّاسَ جَمِیعࣰا وَمَنۡ أَحۡیَاهَا فَكَأَنَّمَاۤ أَحۡیَا ٱلنَّاسَ جَمِیعࣰاۚ} [المَائـِدَة: ٣٢]، وسيدنا النبي ﷺ قال: "الْمُسلم من سلم النَّاس من يَده وَلسَانه، وَالْمُؤمن من أَمن النَّاس بوائقه"، وكمان قال: "إنكم لا تَسَعُون الناس بأموالكم، ولكن لِيَسَعْهُم منكم بسط الوجه وحسن الخلق".
وأوضحت: البطولة الحقيقية إنك تبني.. مش تهدم.. تنكر ذاتك، وتعيش لنفسك ولغيرك، ودايما اسأل نفسك: اللي بيمنّيك بالجنة.. ما راحش بنفسه لطريقها المزعوم ليه؟ اللي بيقولك انت بطل: ما أخدش راية البطولة لنفسه ليه؟ اللي بيقولك انت بتنصر الدين: ما قامش ينصره بنفسه وماله وولاده ليه؟ اللي بيقول الدين عايزك تشتم وتلعن وتعطل وتقتل: أومال الشيطان عايزك تعمل إيه؟، وفي الآخر، خليك فاكر: كل واحد هيدخل قبره لوحده وهيتحاسب لوحده، ربنا هو العدل، في الدنيا وفي الآخرة.. والبلد دي ربنا حارسها بفضله وبرجالها الشرفاء.
