طبيبة بيطرية تناشد التدخل لعلاجها بعد تدهور حالة قدمها: محتاجة حد يتكفل بعلاجي

استغاثت سمر عبد الرحمن، الطبيبة البيطرية المعروفة بلقب طبيبة الإنسانية، استغاثة عاجلة تطلب فيها المساعدة من رجال الأعمال وأهل الخير، بعد تدهور حالتها الصحية وعجزها عن تحمل تكاليف العلاج.

طبيبة بيطرية تناشد التدخل لعلاجها بعد تدهور حالتها الصحية: محتاجة حد يتكفل بعلاجي 

قالت سمر عبد الرحمن، الطبيبة البيطرية، في تصريحات خاصة لـ القاهرة 24: ومن وقت ما اتسرقت عيادتي وعندي مشاكل مادية.

وأضافت: حاليًا رجلي بقت تعبانة جدًا، ومفيش دكتور عارف يعالجها، وتقريبًا بقت زي القدم السكري، وأنا بقيت غير مقتدرة ماديًا بعد اللي حصل، ومشكلتي الأساسية دلوقتي هي الفلوس التي تمنعني من العلاج.

واستكملت: كنت عاوزة أتعالج لكن أنا مش قادرة أتحمل تكاليف العلاج، وفيه ناس بتقترح إني أروح القاهرة، لكن صعب عليّا جدًا السفر بسبب حالتي الصحية.

وأوضحت: أنا مريضة سكر وبحتاج الحمام بشكل مستمر، وكمان رجلي بتتعب من القعدة، غير إن السفر نفسه مكلف وأنا مش قادرة عليه، وكل ده مخليني مش عارفة أتصرف.

واستكملت: أنا عاوزة حد من رجال الأعمال يتبنى حالتي ويساعدني في علاج رجلي وحجزي في المستشفى، لأني فعلًا معنديش حل تاني.

واختتمت: أرجوكم ورحمة الحجة الغالية، أنا محتاجة علاج بأي طريقة، وأتمنى ألاقي حد يقف جنبي في ظروفي دي، لأن وضعي الصحي صعب ومش مستحمل تأخير أكتر من كده.