مصاب من 25 سنة.. أول تعليق لشاب من ذوي الهمم بعد تصدره التريند بفيديو الرقص: نفسي في كرسي كهربائي
"مكنتش متخيل إني أوصل للتريند"، هكذا جاء أول تعليق للشاب محمد هاشم من ذوي الهمم بعد تصدره تريند مواقع التواصل الاجتماعي، من خلال فيديو الرقص في فرح صديقه، حيث جذب إعجاب ملايين المتابعين، موضحًا كواليس هذا المقطع.
أول تعليق لشاب من ذوي الهمم بعد تصدره التريند بفيديو الرقص في الفرح
وقال هاشم في تصريحاته لـ القاهرة 24: الفيديو ده كان ابني اللي بيصورني في فرح صديقي، ودي مش أول مرة أعمل كده، أنا على طول بحب أتعامل عادي.. كنت فرحان جدًا وسط صحابي، ومكنتش متوقع فرقعة الفيديو وإني أوصل للتريند بالسرعة دي.
وأضاف: متضايقتش ولا خوفت أظهر قدام الناس، أنا بتعامل بطبيعتي وبشوف إني طبيعي الحمد لله، والناس اللي حواليا دايمًا بيحسسوني إني طبيعي من غير إعاقة. لازم أتعامل مع الوضع بشكل طبيعي لأن ده ابتلاء من ربنا ولازم أواجهه، والحمد لله نشكر ربنا على كل حال.
صاحب الفيديو: إصابتي بسبب حادثة قطار من 25 سنة
وحكى الشاب عن إصابته قائلا: إصابتي جات بسبب حادثة قطار من حوالي 25 سنة، كان عمري وقتها 12 سنة، كنت بركب القطر واتكعبلت ووقعت تحته، كنت بلبس أطراف صناعية بسيطة لكن مكنتش بعرف أتعامل بيها، ونفسي أجيب جهاز مناسب لحالتي يسهل على الحركة، لأن الجهاز غالي جدًا، وعايز كمان أجيب كرسي متحرك كهرباء.
وعن حياته اليومية وعائلته، كشف: أنا شغال على العربية بإحدى تطبيقات النقل الذكي، متعود أشتغل من وأنا صغير ومعتمد على نفسي من سن 20 سنة، ساعدت في جوازات إخواتي البنات، ومتزوج وعندي 3 أولاد، نفسي أسدد ديوني والحمد لله على كل حال.
واختتم الشاب بحديثه عن حلمه: أنا بحب التمثيل جدًا، وحلم حياتي أمثل وأتصور مع أحمد العوضي وتامر حسني، وبالفعل تشجيع الناس في التعليقات أعجبني جدًا وشجعني أكمل.
