بسبب حالته الصحية.. أم تروي تفاصيل صادمة لرفض نجلها بكلية التربية: ابني نفسيته اتدمرت وتأمينه اتوقف

روت والدة الشاب يوسف، البالغ من العمر 20 عامًا، تفاصيل أزمة تعرض لها نجلها أثناء التقديم بكلية التربية، مؤكدة أن حالته الصحية كانت سببًا في رفضه، ما تسبب في تدهور حالته النفسية وتوقفه عن استكمال تعليمه.

 أم تروي تفاصيل صادمة لرفض نجلها بكلية التربية: ابني نفسيته اتدمرت

وقالت والدة يوسف في تصريحات خاصة لـ القاهرة 24: سنة 2024 روحنا جامعة حلوان كلية تربية كان في كشف هيئة، وكل واحد بياخد دوره، فأنا واقفة هما ندهولي وقالولي إنت والدة يوسف هاني، قالي دا مش هينفع يدخل كلية تربية، دا شكله شكل طفل ومش هينفع، فإزاي هيدخل تربية.

وأضافت: قولت له دا مش ذنبه، دا مرضه من عند ربنا، وكدا نفسيته هتتدمر أكتر ما هي متدمرة، قالي طيب هو لو فضل هيتعرض للتنمر.

واستكملت: قالي حوّلي لكلية تانية على حسابك الخاص، بس أنا ظروفي متسمحش أنقله، وأنا ابني لو عرف هتجيله صدمة وهو أصلا نفسيا تعبان، وهو متفوق وشوف شهاداته، قالي مش هينفع ناخده، يبقى مدرس الطلبة هتتنمر عليه وحالته النفسية هتبقى أوحش.

واستكملت: نده لابني وضاه على ورق، ابني نفسيته اتدمرت وقالي أنا مش هروح حتة تانية ولا هكمل ولا عايز حاجة، أنا ماليش لازمة في الحياة، بقيت أهديه وقعد 6 شهور في البيت.

واختتمت الأم حديثها: نتيجة توقف تعليمه، التأمين وقف، وأنا مش عارفة أعمل إيه.